الناس غضبانة من ماسورة الغلاء اللى ضربت فى البلد فجأة: كرتونة البيض وصلت إلى 65جنيها.. الزيت بقى بالشىء الفلانى والرز والسكر والدقيق.. ده حتى أصحاب المخابز، اللهى يتشووا فى نار جهنم، رفعوا سعر الرغيف السياحى وسخطوا وزنه للنص حتى لم يعد يكفى طفلا يحبو.. والجزارون، إلهى يتقطعوا بسكين تلمة، رفعوا سعر كيلو اللحم إلى 200 جنيه.. ده حتى الفاصوليا بقت بـ 35 جنيها للكيلو..!!
ياجماعة فاصوليا إيه اللى زعلانين على ارتفاع سعرها..؟! حبكت يعنى.. هى وحمة..؟! ماتاكلوا أى خضار تانى بدالها.. كلوا بامية.. كلوا بسلة.. أو حتى "كوسة" فالكيلو منها بتمانية جنيه بس..!!
ولا أقول لكم بلاش "كوسة".. إحنا مش ناقصين؛ فـ "الكوسة"، وأخوها القرع طبعا، هما سبب كل البلاوى اللى بنعانى منها اليومين دول..!!
بالمناسبة.. القرارات التى أصدرتها نيفين جامع، وزيرة التجارة والصناعة، بحظر تصدير الزيوت والدقيق والذرة و الفول والعدس قرارات جيدة جدًا..
لكن أموت وأعرف.. ليه معاليها أصدرت قرارًا بحظر تصدير "الفريك".. أى والله الفريك بتاع حشو الحمام..؟!
يمكن علشان الفريك، زى ما بيقول المثل: "مابيحبش شريك"..!!
موافقة مجلس النواب الموقر على تعديل قانون تنظيم السجون لتغيير مسمى "السجون" ليصبح "مراكز إصلاح وتأهيل عمومية".. ومسمى "السجناء" ليصبح "النزلاء" فكرنى بفيلم أم رتيبة عندما قرر حسن فايق تغيير اسمه فأصبح"علي بنجر" بدلا من "سيد بنجر".. يعنى كله فى الآخر "بنجر"..
لا مؤاخذة..!!
أنا فرحان قوى بالرئيس الأوكرانى بعد تأكيده أن بلاده اقتربت من الانتصار النهائى على روسيا فى الحرب الدائرة الآن.. وبهذه المناسبة بأهديه أغنية "الكداب بيروح النار وإنت بتكدب ليل ونهار"..!!
الدمعة كانت بتفر من عينى عندما كنت أسمع زمان شعارات الاتحاد الدولى لكرة القدم "الفيفا" بعدم تدخل السياسة فى الرياضة؛ لأن الرياضة أسمى من أن تلوثها السياسة وألاعيبها اللا أخلاقية..!!
لكن بعد أن منع "الفيفا" روسيا من الاشتراك فى كأس العالم وفى أى مباراة كورة؛ لعدوانها على أوكرانيا.. لن أقول أبدًا ما كنت أقوله دوما من أن "فيفا" تحول إلى "فيفا عبده".. لسبب بسيط جدًا هو إن الست "فيفا" عبده أجدع منه بكتيييييييير؛ لأنها مش بوشين..!!
بالمناسبة مقاطعة شركات السينما لروسيا وإغلاق فروع سلاسل المطاعم الأمريكية فى المدن الروسية دليل قاطع وبرهان ساطع على أن الحرية الأمريكية هى حرية بالمهلبية.. وأن حرية السوق كدبة كبيرة صدعتنا بها ماما أمريكا.. فما يحدث ليس حرية "سوق" بل حرية "سوء".. لا مؤاخذة..!!
خيبة بالويبة.. فبعد هزيمة كل من الأهلى والزمالك.. ياريت الأهلاوية والزملكاوية يبطلوا تحفيل على بعض.. فالمثل بيقول: لا تعايرنى
ولا أعايرك الهم طايلنى وطايلك....!!