بعد انتشاره في ١٢دولة… ١٧ سؤال وجواب عن "جديري القرود"

بعد إصابة أكثر من ٨٢حالة وانتشاره في أكثر من ١٢ دولة حول العالم هل جدري القرود الوباء القادم ؟

نستعرض في التقرير التالي ١٧سؤال وجواب حول جدري القرود بحسب تصريحات الدكتور إسلام عنان أستاذ اقتصاديات الصحة وعلم انتشار الأوبئة

س١ : هل هو نفس الجدري القديم اللي بيموت؟

ج: لأ، الجدري (smallpox) انتهى من العالم ١٩٨٠ والجيل القديم هو اللي فاكره من مكان التطعيم وحالياً مش بندي التطعيم للجدري لذلك معرضين للاصابة اكتر من فيروسات شبيه للجدري زي جدري القردة (monkeypox).

س٢: يعني تطعيم الجدري ينفع مع جدري القردة؟

ج: نعم، وفعال بنسبة ٨٥٪؜ وفي ٢٠١٩ امريكا وافقت على اول لقاح متخصص في الmonkeypox واسمه Jynneos.

س٣: ليه مش بننتج اللقاح؟

ج: عشان انتشار جدري القردة مش عالي ووفياته أقل من ١٪؜ وبيتعالج بمضاد للفيروسات وفي خلال ٤إلى ٦ أسابيع بيخف المريض بس هو موجود بكميات قليلة.

س٤: ليه هو انتشاره مش زي كورونا؟

ج: لأ معامل انتشاره (Ro) أقل من (١) وده معناه محتاج أكثر من مصاب عشان يصيب شخص سليم احصائياً… ولو فاكرين كورونا كان معامل الانتشار Ro (٢-٣) يعني المصاب بيعدي ٢ او ٣ فالمنحنى بيزيد لكن جدري القردة في كل موجاته الإصابات تراجعت بسرعة.

س٥: يعني مش هيبقى جائحة زي كورونا؟

ج: طبعاً مفيش إجابة قاطعة ١٠٠٪؜ بس طبيعة ونمط هذا الفيروس صعبة جداً في الانتقال ما بين البشر واحتمال تحوره ضعيفة للغاية لذلك فرضية أنه يبقى جائحة عالمية صعبة.

س٦: هو بيجي من القرود؟

ج: لأ… هو إسمه كده عشان تم التعرف على الفيروس في الدنمارك ضمن مجموعة قرود المعمل ولكن هو موجود في القوارض والسنجاب وممكن يعدي بعض فصائل الكلاب زي ما حصل في ٢٠٠٣ في شحنة كلاب برية جاية من إفريقيا لأمريكا وعدت ٧٠ شخص بسبب اختلاط الكلاب بالإنسان… بس ملحوظة مهمة كلاب البيت والشارع في مصر مش ناقل للمرض عشان محدش يقلق من الكلب بتاعه.

س٧: هل موطنه الأصلي إفريقيا؟

ج: ده صحيح… أول إصابة للبشر كان في الكونغو (زائير وقتها) سنة ١٩٧٠ ويقال إن أول مصاب في الموجة الحالية كان قادم من نيجيريا.

س٨: يعني ده مش فيروس جديد ولا دي أول موجة؟

ج: الفيروس موجود من عشرات السنين… وكان فيه موجة في ٢٠٠٣ أمريكا و٢٠٠٩ في السودان بس كان بيتم السيطرة عليها بعدد إصابات قليلة ووفيات نادرة لو فيه موارد وآليات صحة جيدة في البلد المصابة.

س٩: طب العدوى بتحصل ازاي؟

ج: عن طريق عضة من الحيوان المصاب او خدش لإنسان او يحصل انتقال لعاب او سوائل الحيوان مع الإنسان (متسألنيش ازاي) وبعد كده المريض بيفضل في فترة حضانة الفيروس ٥ أيام تقريباً (ونادراً لحد ٢٠ يوم) وإنتقال العدوى من شخص لشخص صعبة للغاية عن طريق رزاز كبير الحجم من الجهاز التنفسي للمريض لشخص سليم بس محتاجة حمل فيروسي عالي ووقت تعامل طويل عشان العدوى تحصل وبرضو العدوى بتحصل من الصديد اللي موجود في الطفح الجلدي الموجود على جسم المريض وبرضو بينتقل عن طريق الاتصال الجنسي وعشان كده معامل انتشاره بين البشر قليل.

س١٠: ما هي أعراضه؟

ج: بعد فترة حضانة الفيروس بتبدأ بأرتفاع في درجة الحرارة ووهن في العضلات وصداع وأوقات تورم في الغدد الليمفاوية وبعد كده ظهور الحويصلات والبثرات المليئة بالصديد (الطفح الجلدي) المميز للجدري (pox) على الوجه والإيدي والرجلين… واللي بتروح بعد ٣ أسابيع تقريباً. لو فيه عناية كويسة والمريض معندوش مشاكل معينة تمنع الشفاء ممكن معدلات الوفاة تبقى اقل من ١٪؜ ولو لأ ممكن توصل ١٠٪؜.

س١١: فيه فئات معرضة للإصابة الشديدة أكثر من غيرهم؟

ج: الأطفال وضعيفي المناعة وكبار السن فوق ٧٠ والذين لا يقدرون على تناول الأدوية المضادة للفيروسات.

س١٢: كيف يتم اكتشافه وتشخيصه؟

ج: تشخيص مبدأي إكلينيكي بالأعراض بعد كده لازم معمل لعمل PCR أو antigen test وبعض الكواشف الأخرى لعزل الفيروس لو احتاجنا لذلك.

س١٣: كيف يمكن الوقاية؟

ج: دائمًا النظافة هي الحل الأول مثل غسل الأيدي وطبعاً عدم التعامل مع الحيوانات البرية على الاطلاق وعزل والبعد عن المصابين وعدم التعامل معهم مباشرة لو ظهر عليهم أعراض ولو ظهر أعراض على حيوانات بيتم عزلها وعزل المخالطين.

س١٤: طب والعلاج؟

ج: مضادات للفيروسات وهي غير متخصصة في جدري القردة ولكنها فعالة… وطبعاً مع علاج الأعراض.

س١٥: عالمياً ايه المفروض يتغير عشان منسمعش تاني عن فيروسات من الحيوانات البرية بتقفز الانسان؟

ج: على المستوى العالمي متهيألي ده وقت منع تداول والاتجار والتعامل مع الحيوانات البرية كفاية ما حدث مع كورونا… مش عارف ليه مش عايزين نسيب الحيوانات في حالها.

س١٦: هل الكمامة تحمي من الإصابة؟

ج: طبعاً في التعامل مع المرضى لازم الكمامة بما أنه بينتقل عن طريق سوائل الجهاز التنفسي.

س١٧:هل هيدخل جدري القردة مصر؟

ج: مفيش إجابة للسؤال ده مؤكده… كل شيء ممكن ووزارة الصحة المصرية عندنا الحمد الله قوية في الطب الوقائي والوبائي ولو فيه حالات هيتم اكتشافها بسرعة وهيتم التعامل معاها.

وأخيرًا قال عندن إنه لاأحد غير المتخصصين تقريبًا كان يعلم بموجة المرض سنة ٢٠٠٣ ، فمن مميزات كورونا القليلة هي تسليط ضوء أكثر على علم انتشار الأوبئة الدوائي والطب الوقائي واتمنى ينعكس على زيادة تمويل البحث العلمي والحد من اسباب انتشار الفيروسات من الحيوانات البرية للإنسان مثل منع التعامل والاتجار بالحيوانات البرية.