قال الشيخ خالد الجندى، عضو المجلس الأعلى للشئون الإسلامية: إنه من ألطاف الله علينا أننا نجهل متى وكيف وأين سنموت، مضيفا: "تصور حضرتك لو عندك كتاب غيب وعارف هتموت فين وإمتى؟ يعنى مثلا لو عارف إنك هتموت بعد سنتين فى المكان الفلانى الساعة كذا يوم كذا، حضرتك من النهارده خلال السنتين دول هتلغى الطريق ده من حياتك خالص، ومع ذلك هتيجى وتنسى وتروح وهيحدث أمر الله".
وتابع الجندى: "شوف بقى حجم الهم والكرب اللى هتكون فيه خلال السنتين دول اللى عارف إنك هتموت بعدهم، عشان كده ده من ألطاف الله علينا إننا منعرفش هنموت أمتى وفين بس لازم نكون جاهزين ومستعدين للقاء الله على شهادة، دى حياتك استعد وقف النميمة والخصام، دى حياتك اللى أنت مضيعة فى النوم والانتخه، اعتبروا الدنيا أوتيل، جهز نفسك دائما للقاء الله".
ونوه الجندى، إنه يقال فى رواية لطيفة جدا إن الإمام مالك رضى الله عنه وأرضاه، رأى ملك الموت شاف، فى المنام، فالسؤال التقليدى اللى شاغل الناس كلها هموت فين وإمتى، فأشار ملك الموت للإمام مالك 5 واختفى، فنادى: "يا ملك الموت أي خمس تقصد"، واستيقظ مذعورا يبحث عن من يفسر له هذه الرؤية، منوهًا إلى أن تفسير الرؤى مجرد تخمين وليس علم يقين، مشددًا على أنه لا يوجد علم يسمى تفسير الأحلام.
وأشار الجندى، إلى أن الإمام مالك توجه للإمام ابن سيرين، وقص له رؤيته، فقال له إن ملك الموت يريد أن يخبره أن مفاتيح الغيب خمسة لا يعلمها إلا الله، وهي "علم الساعة، وينزل الغيث، ويعلم ما في الأرحام، وما تدري نفسًا ماذا تكسب غدًا، وماتدري نفسًا بأي أرض تموت.. وملك الموت لا يعلم أيضا مواعيد موت الخلائق قبلها".