تسود حالة من الهلع والخوف بعد إعلان وزارة الصحة والسكان ظهور أول إصابة ب جدري القرود في مصر ،ما هو جدري القرود وأعراضه وعلاجه وطرق الوقاية منه هذا ما نتعرف عليه من خلال ٢٣سؤال وجواب مع الدكتور إسلام عنان أستاذ اقتصاديات الصحة وعلم انتشار الأوبئة.
س١: هل ظهور أول حالة من جدري القرود يساوي نفس الخوف بعد ظهور أول حالة من كورونا؟
ج: الوضع مختلف تمامًا فاكتشاف أول حالة من جدري القردة في مصر لا يقارن باكتشاف أول حالة من كورونا في مصر
س٢: بس العدوى ممكن تبدأ في مصر وينتشر؟
ج: العدوى صعبة جداً في الجدري (الشخص بيعدي شخص تقريباً) ،بينما كورونا حاليًا الشخص بيعدي ١٢-١٤).
س٣: هل كنا متوقعين حالات في مصر؟
ج: دا مكنش مستبعد وتقريبًا البلاد كلها حولنا في حالات سواء السودان، السعودية، الإمارات والمغرب توقعت ظهور حالات لأن العالم مش مقفول ولا يوجد غلق للحدود أو ع.
س٤: ما هي الحالة الصحية للشخص المصاب ؟
ج: الحالة مستقرة ولشخص مقيم في أسبانيا وفي مستشفى عزل المنصورة حالياً وعنده ٤٢ سنة وذهب من المطار على المستشفى
س٥: وبالنسبة للمدارس؟
ج: مفيش قلق على المدارس من جدري القردة، ولكن الخوف من الموجة السابعة من كورونا هتبدأ فالخريف بس متوقع أنها تكون موجة خفيفة ولكن تشهد زيادة في الإصابات والوفيات من الموجة السادسة بسبب الشتاء و أن معظم المصريين عدى عليهم أكثر من ٦ شهور من آخر جرعة تطعيم.
س٦: هل هو موجود فقط عند الشواذ جنسياً؟
ج: لا ،وهذه وصمة محتاجين ننساها وللأسف موجودة في الإيدز… صحيح معظم الإصابات لدى الرجال الشواذ جنسياً متعددي العلاقات لأن البؤرة الأولى للانتشار ،ولكن موجود عند الرجال والنساء والاطفال.
س٧: وكيف تحدث العدوى ؟
ج: عن طريق عضة من الحيوان المصاب أو خدش لإنسان أو يحصل انتقال لعاب أو سوائل الحيوان مع الإنسان وده بجدري القردة الأصلي ،ولكن الموجود حالياً بينتقل من إنسان لإنسان، وبعد كده المريض بيفضل في فترة حضانة الفيروس ٥ أيام تقريباً (ونادراً لحد ٢٠ يوم) وإنتقال العدوى من شخص لشخص عن طريق رزاز كبير الحجم من الجهاز التنفسي للمريض لشخص سليم بس محتاجة حمل فيروسي عالي ووقت تعامل طويل عشان العدوى تحصل وبرضو العدوى بتحصل من الصديد الموجود في الطفح الجلدي الموجود على جسم المريض ،و بينتقل عن طريق الاتصال الجنسي بسبب الاتصال الوثيق ولكن معدلات انتشارة قليلة.
س٨: لماذا انتشاره يختلف عن الكورونا؟
ج: معامل انتشاره (Ro) أقل من (١) وده معناه محتاج أكثر من مصاب عشان يصيب شخص سليم احصائياً… ولو فاكرين كورونا كان معامل الانتشار Ro (٢-٣) يعني المصاب بيعدي ٢ أو ٣ فالمنحنى بيزيد لكن جدري القردة في كل موجاته الإصابات تراجعت بسرعة.
س٩: ما هي الأعراض؟
ج: بعد فترة حضانة الفيروس بتبدأ بأرتفاع في درجة الحرارة ووهن في العضلات وصداع وأوقات تورم في الغدد الليمفاوية وبعد كده ظهور الحويصلات والبثرات المليئة بالصديد (الطفح الجلدي) المميز للجدري (pox) على الوجه والإيدي والرجلين واللي بتروح بعد ٣ أسابيع تقريباً. لو فيه عناية كويسة والمريض معندوش مشاكل معينة تمنع الشفاء ممكن معدلات الوفاة تبقى أقل من ١٪ ولو لأ ممكن توصل ١٠٪.
س١٠: هل هو نفس الجدري القديم اللي بيموت؟
ج: لأ، الجدري (smallpox) انتهى من العالم ١٩٨٠ والجيل القديم هو اللي فاكره من مكان التطعيم وحالياً مش بندي التطعيم للجدري لذلك معرضين للإصابة أكثر من فيروسات شبيه للجدري زي جدري القردة (monkeypox).
س١١: يعني تطعيم الجدري ينفع مع جدري القردة؟
ج: نعم، وفعال بنسبة ٨٥٪ وفي ٢٠١٩ أمريكا وافقت على أول لقاح متخصص في الmonkeypox واسمه Jynneos وحالياً اتوزع منه ملايين الجرعات في أمريكا و أوروبا.
س١٢: وهل لقاح الجدري مثل لقاح كورونا؟
ج: المختلف أن لقاح جدري القردة ممكن الشخص المختلط أو المصاب في أول الاصابة يتناوله عكس كوفيد يجب أن يكون الشخص خالي من الإصابة.
س١٣: يعني مش هيبقى جائحة مثل كورونا؟
ج: طبعاً مفيش إجابة قاطعة ١٠٠٪ بس طبيعة ونمط هذا الفيروس صعبة جداً في الانتقال ما بين البشر واحتمال تحوره ضعيفة للغاية لذلك فرضية إنه يبقى جائحة عالمية مثل كوفيد صعبة في ٧ شهور حالات جدري القردة ٥٢ ألف فقط ، كورونا في نفس الفترة الزمنية كانت ٢٥ مليون.
س١٤: لماذا يسمى بجدري القردة ؟
ج: هو أسمه كده عشان تم التعرف على الفيروس في الدنمارك ضمن مجموعة قرود المعمل ولكن هو موجود في القوارض والسنجاب وممكن يعدي بعض فصائل الكلاب زي ما حصل في ٢٠٠٣ في شحنة كلاب برية جاية من إفريقيا لأمريكا وعدت ٧٠ شخص بسبب اختلاط الكلاب بالإنسان… بس ملحوظة مهمة كلاب البيت والشارع في مصر مش ناقل للمرض عشان محدش يقلق من الكلب بتاعه.
س١٥: هو مش موطنه الأصلي إفريقيا، لماذا انتشر؟
ج: ده صحيح… أول مرة أصيب به البشر كان في الكونغو (زائير وقتها) سنة ١٩٧٠ ويقال أن أول مصاب في الموجة الحالية كان قادم من نيجيريا وهذه أول موجة يحصل فيها هذا الكم من الإصابات (الموثقة) خارج إفريقيا.
س١٦: يعني ده مش فيروس جديد ولا دي أول موجة؟
ج: الفيروس بقاله عشرات السنين وكان فيه موجة في ٢٠٠٣ أمريكا و٢٠٠٩ في السودان بس كان بيتم السيطرة عليها بعدد إصابات قليلة ووفيات نادرة لو فيه موارد وآليات صحة جيدة في البلد المصابة.
س١٧: هل يوجد فئات معرضة للإصابة الشديدة أكثر من غيرهم؟
ج: الأطفال وضعيفي المناعة وكبار السن فوق ٧٠ والذين لا يقدرون على تناول الأدوية المضادة للفيروسات أو أدوية تعالج الأعراض عامةً. لكن حتى الان لا يوجد سوى نسبة قليلة من الوفيات وبسبب اهمال الأعراض.
س١٨: كيف يتم اكتشافه وتشخيصه؟
ج: تشخيص مبدأي إكلينيكي بالأعراض بعد كده لازم معمل لعمل PCR أو antigen test وبعض الكواشف الأخرى لعزل الفيروس لو احتاجنا لذلك.
س١٩: كيف يمكن الوقاية؟
ج: دايما النظافة هي الحل الأول مثل غسل الأيدي وطبعاً عدم التعامل مع الحيوانات البرية على الإطلاق وعزل والبعد عن المصابين وعدم التعامل معهم مباشرة لو ظهر عليهم أعراض ولو ظهر أعراض على حيوانات بيتم عزلها وعزل المخالطين.
س٢٠: طب والعلاج؟
ج: مضادات للفيروسات وهي غير متخصصة في جدري القردة ولكنها فعالة ،وطبعاً مع علاج الأعراض. و٩٥٪ من الحالات خفت بعلاج الأعراض فقط بعد أسبوعين بدون مضاد الفيروسات.
س٢١: عالمياً ما الذي يجب أن يتغير عشان منسمعش تاني عن فيروسات من الحيوانات البرية بتقفز الإنسان؟
ج: على المستوى العالمي هذا وقت منع تداول والاتجار والتعامل مع الحيوانات البرية كفاية ما حدث مع كورونا
س٢٢: هل ارتداء الكمامات معم مع جدري القرود ؟
ج: طبعاً في التعامل مع المرضى لا بد من ارتداء الكمامة بما إنه ينتقل عن طريق سوائل الجهاز التنفسي.
س٢٣: لماذا دخل جدري القردة مصر؟
ج: في الوضع الحالي للسفر صعب تسيطر على بلد وتقفلها عشان كده المنطقة كلها فيها إصابات وكان متوقع بس الحمد الله وزارة الصحة المصرية قوية في الطب الوقائي والوبائي (احنا لينا باع قديم في الأوبئة من أيام الكوليرا ولو فيه حالات جديدة هيتم اكتشافها بسرعة وهيتم التعامل معاها.