مليون تحية لـ "دكتورة الغلابة"بالإسكندرية "نوران يحيى عزب".. أستاذة الأمراض الصدرية والحساسية بكلية الطب.. فكشفها لا يزال 35 جنيهًا بس؛ وتعالج المرضى الغلابة ببلاش وتصرف لهم الدواء بردو ببلاش.. وهى تعمل فى صمت من غير أى زيطة أو زمبليطة.. والله العظيم دى ست بمليون راجل مما يعدون؛ لأنها بتمارس الطب كرسالة مش كتجارة زى بعضهم.
هى دى مصر العظيمة وهما دول ملائكة الرحمة العظماء.. قوتنا الناعمة الحقيقية التى نباهى بها الأمم.. مش "نمبر زفت" وشاكوش وبكوش وحلق حوش..!!
إيه الحكاية.. هو إحنا كل خرابة لازم يطلع لنا فيها عفريت..؟!!
فقد استبشرنا خيرًا بأن يساعد قانون السماح للمصرى العامل بالخارج باستيراد سيارة مقابل وديعة دولارية.. بتخفيف حدة نقص النقد الأجنبى.. لكن لم يحدث أى شىء من ذلك حتى لحظة كتابة هذه السطور..!!
والسبب أن "الجهابذة" الذين وضعوا القانون فرغوه من مضمونه؛ وهو سرعة توفير النقد الأجنبى؛ وقاموا بوضع مجموعة كبيرة من "الخوازيق"، أمام أى مصرى يفكر،
مجرد التفكير، فى الاستفادة منه..!
من هذه "الخوازيق" شرط أن يكون النقد الأجنبى مودعًا بأحد بنوك الدولة التى يعمل بها المصرى لمدة 3 شهور، وأن يشترى المصرى السيارة من البلد الذى يعمل به وليس من أى بلد آخر..؟!!
إيه الهرتلة دى..؟! أنتم مالكم المصرى يجيب سيارته منين.. تفرق معاكم فى إيه يعنى..؟!
وبعدين أنتم مالكم المصرى اللى شغال بره حاطط فلوسه فين.. فى بنك ولا تحت البلاطة.. ده يهم حضراتكم فى إيه..؟!
بصراحة أنا مش عارف اللى عمل القانون ده عايز إيه بالضبط.. أكل ولا بحلقة..؟!
واضح إن حضرته عايز البحلقة وبس.. لك الله يا مصر..!
بالمناسبة.. هذا القانون يهدف إلى زيادة تحويلات المصريين العاملين بالخارج؛ وهو ما سبق أن طالبت به منذ عدة أسابيع؛ لأن هذه هى أسرع وسيلة لزيادة موارد النقد الأجنبى.
كما طالبت أيضًا بطرح المزيد من أراضى البناء على المصريين بالخارج وسداد قيمتها بالنقد الأجنبى؛ مع تسهيل كل الإجراءات لهم لبنائها؛ وطرح وحدات العاصمة الإدارية والعلمين الجديدة عليهم بأسعار مناسبة وبالتقسيط.. وكله بالنقد الأجنبى.. مع تسهيل إجراءات استثمارهم فى المشروعات الصغيرة ومتناهية الصغر؛ بل مساعدتهم بدراسات الجدوى والخبرات التى تحتاجها مثل هذه المشروعات، الحلول كتيرة.. بس المهم الحكومة تشغل مخها وتتحرك بسرعة.. لأن الوقت ليس فى صالحها
ولا فى صالح أي أحد..!!
المصريون اللى خلفوا ربع مليون عيل فى 56 يومًا فقط عداهم العيب وقزح..!!
الناس مالهاش ذنب.. فالحكومة بتطالبهم ليل نهار بزيادة الإنتاج.. ومقالتش أى إنتاج تقصد.. فالناس زودوا إنتاج الحاجة الوحيدة اللي شاطرين فيها.. إنتاج العيال..!!
مش ده إنتاج بردو.. ولا مش إنتاج.. يامتعلمين يا بتوع المدارس..؟!!