رحل عن عالمنا اليوم الفنان الكبير صلاح السعدني عن عمر ناهز 81 عاماً ، وكانت تربطه صداقة قوية برفيق مشواره الفني الزعيم عادل إمام، وسعيد صالح.
بدأ صلاح السعدني مشواره الفني مع أصدقاء عمره عادل إمام وسعيد صالح، ولكن صلاح السعدني، اتجه للعمل في الدراما التليفزيونية، التي تميز فيها وخاصة في بداية الثمانينيات من القرن الماضي، عكس عادل إمام وسعيد صالح، اللذان تفرغا أكثر للسينما والمسرح.
وفي حديث سابق للفنان الراحل سعيد صالح، في لقاء نادر ببرنامج "ساعة صفا" مع الفنانة والإعلامية صفاء أبو السعود تحدث فيه عن صداقتهم الثلاثية وقال : "طول حياتي لي 3 أصدقاء عمر، هم عادل إمام ، وأحمد ماهر الشهير بـ (ماهر تيخة)، وصلاح السعدني، دي شلة العمر وكان زمان صحفي كتب (سعيد كالسعدني)، إن احنا الاتنين من طينة واحدة وشكل واحد وحكاية عمر واحدة".
وتابع: "في الشلة بتاعتنا، صلاح كان المتكلم والمتحدث اللبق اللي فينا، بس هو مكنش ليه دعوة بالمسرح ولا بالسينما، أنا وعادل دخلنا وتفوقنا في المسرح والسينما، صلاح بقى خد كاريير المسلسلات، فبقى مندوبنا الدائم في التليفزيون، وعمل أرضية ممثل من أكبر وأهم الممثلين في تاريخ التليفزيون العربي ".
وأوضح سعيد صالح: "أنا وعادل لو كنا دخلنا معاه الدراما والمسلسلات، مكناش هنعمل أكثر من اللي عمله صلاح ومكناش أصلا هنصل للي عمله، أدوار كثيرة جدا كنت أنا مرشح لها، واعتذرت فعملها صلاح، وبقى بالنسبة لي كأن سعيد صالح هو اللي عملها، وحبيتها من صلاح زي ما كنت هحبها من نفسي وأكتر كمان، منهم (ليالي الحلمية) و (أرابيسك).. كنت أنا هعمل العمدة وحسن أرابيسك وعملهم صلاح، وكان جميل جدا وأجمل مني لو عملتهم".
واستكمل: "هو كان الضلع الثالث بتاعنا أنا وعادل في الفن، هو اللي كان سادد المسلسلات لوحده".
وأضاف: " صلاح زمان كان رفيع جدا وأنا كمان، وفي مسلسل اسمه (هارب من الأيام) كنت أنا وصلاح رفيعين و(مسلوعين) ومكنش فيه لا أكل ولا شرب ولا لبس، هما قميص وبنطلون اللي حيلتنا ولا حتى كان عندنا جزم نلبسها، فإستغلينا المسلسلات بتاعة الفلاحين، وقعدنا منعملش غيرها في البدايات لأن الهدوم فيها كانت ببلاش، كانوا بيدونا في التليفزيون جلاليب فكانت حلوة كمان عشان تداري رفعنا".