وفاة أحد المصابين بفيروس كورونا في شارع «سيدي حبيب» بالمنيا

كتب: جمال عبدالمجيد

توفي اليوم "محمد عبد الله"، من ابناء شارع سيدي حبيب بمدينة المنيا، حيث يخضع 35 منزلا بذلك الشارع للحجر المنزلي.

وكتب أهالي الحي على صفحات الفيسبوك : "يأتي فيروس بحجم كورونا ويغير كل حياتنا، فها نحن في الحجر الصحي، وأسرة المتوفى أغلبهم في العزل بالمستشفى، ونترحم ونحن في أماكننا.. سبحان الله، فلأول مرة منذ عقود يتوفى أحد من الشارع، ولا نقف مع أهله، ونأخذ عزاه، ونعمل الواجب، فكيف ونحن أهل وعزوة طيلة كل هذه السنوات".

وكانت ابنة المتوفِ "رباب" قد كتبت مساء امس كذلك: أحنا الأسرة المصابة في شارع سيدى حبيب 5 أفراد كلنا إيجابي، وأخويا طلع سلبي يعنى مش هو اللى جابلنا كورونا من بره، ووالدي مكنش مسافر أسوان ورجع، ومكنش بيطلع من البيت أصلًا، لأنه مريض، أنا اللى كنت بطلع وأروح شغلي وأجيب طلبات البيت وكنا واخدين احتياطاتنا زي أي حد، بس ده قضاء واحنا راضيين الحمد لله.

أضافت: كل اللى هنا في المستشفى ما حدش عارف جاله منين وإزاى بعد اللى أنا شيفاه هنا بقيت متأكدة إن كل واحد ماشى في الشارع هو حامل للفيروس، وما يعرفش اللى مناعته كويسة، الموضوع بيعدى ومن غير ما يحس أصلًا واللى مناعته ضعيفه بيموت، ولما تعبنا روحنا إلى 3 دكاترة ومستشفى الحميات روحونا وقالوا دور برد عادى، يعنى مش ذنبنا.

وقالت أيضا: دلوقتي أنا وأخويا في العزل، وأخويا التاني في أسيوط، وأمي وأخويا في بنى سويف، والدكاترة هنا في العزل الله يقويهم مهتمين جدًا، ومش مقصرين بالعكس عاملين اللى عليهم وزيادة ربنا يقويهم ويعينهم بجد.