الناس اللي هاتروح جهنم حدف زعلانين من دولة رئيس الوزراء؛ قال إيه..؟! لأنه خالف الإجراءات الاحترازية، وسهر فى فرح الأسبوع الماضى، واتصور وهو بيسلم على أبو العروسة والمعازيم من غير أي إجراءات احترازية ولو حتى كمامة يتيمة تخزى العين..؟!!
والناس «السو» اللى مش هايعرضوا على جنة بيتساءلوا، وبراءة الأطفال فى عينيهم: راحت فين قرارات منع التجمعات، والإغلاق من الساعة تسعة، وعقوبة عدم ارتداء الكمامة.. وفوق كل ده وده فين القدوة التى يجب أن يمثلها دولة رئيس الوزراء..؟!!
وبيقولوا، منهم لله : «إذا كان رئيس الوزراء بالدف ضاربا فشيمة أهل البيت كلهم الرقص»..!!
ملحوظة مهمة جدا: أنا ماقلتش حاجة.. دول هما اللى بيقولوا.. منهم لله..!!
يا ليلة سوخة ياجدعان..!!
معقولة الحكومة ترفع على الحكومة أكثر من ألف قضية منظورة الآن أمام المحاكم..!
أنا كنت فاهم إن الحكومة هى اللى بتجرجر الناس للمحاكم، لكن إن الحكومة تجرجر الحكومة لساحات القضاء.. فدى جديدة لنج..!
عموما مليون تحية لحكومة مدبولى التى تسعى الآن لإنهاء هذه «المهزلة» من خلال تسوية النزاعات الحالية؛ وعرض أى نزاع بين الجهات الحكومية عليها لحله دون اللجوء للمحاكم.
وبصراحة لم أجد أفضل من كلمة «مهزلة» لوصف هذا الوضع الغريب، لأن كلنا عارفين طبعا إن «مصارين البطن بتتخانق» زى مابيقول المثل الشعبى، لكننا عمرنا ماشفنا مصارين بترفع قضايا على بعض فى المحاكم إلا مصارين الحكومة.. لا مؤاخذة..!
أدونى سببا واحد لارتفاع أسعار الدواجن بهذه الصورة الجنونية غير أنه جشع تجار ياكلوها والعة..!!
افتحوا استيراد الدواجن على مصراعيه خلوا التجار «يكاكوا.. ويحرموا ينفشوا ريشهم على الشعب»..!!
واحد مابيفكش الخط، من اللى طالعين فى المقدر اليومين دول بينتحل صفة مطرب مهرجانات بينصح الدكاترة والمهندسين إنهم «يجتهدوا شوية» علشان يبقوا زى حضرته معاهم فلوس زى الرز..!
أنا عايز أرد عليه بس خايف لأقع تحت طائلة القانون بتهمة السب والقذف..!
عموما الشاعر العملاق أبو الطيب المتنبى رد عليه وعلى أمثاله من حوالى ألف وخمسين سنة عندما قال: «ذو العقل يشقى فى النعيم بعقله.. وأخو الجهالة فى الشقاوة ينعم».!!