آخر الكلام

إيه الخيابة اللى إحنا فيها اليومين دول..؟!!

نص الشعب تحول لمفكرين سياسيين ومحللين عسكريين وخبراء استراتيجيين.. والنص التانى بيشاور عقله...!!

ارحمونا شوية.. الحكاية مش ناقصاكم..فالوضع جد خطير، ولا يجوز الهزل فى وقت الجد أبدًا..!

خرفان الداخل والخارج شغالين هرى وزن وأكل فى ودان المصريين.. مش عارف ليه سايبينهم لغاية دلوقت.. دول كان لازم يندبحوا من أول يوم العيد..!

× الأطماع الإسرائيلية فى إفريقيا والنيل هو اسم كتاب صدر عام 2016 لأستاذة التاريخ المعروفة د. زبيدة عطا، كشفت فيه المخطط الإسرائيلى للتغلغل فى دول حوض النيل لمحاصرة مصر والضغط عليها وتوصيل مياه النيل لإسرائيل..

والغريب أن المخطط الإسرائيلى استبعده عدد من كبار المسئولين أيام مبارك منهم وزراء وسفراء أكدوا بالنص، أنه غير حقيقى ومجرد.. «كلام عايم»..!!

وللأسف نجحت إسرائيل فى مخططها وبحفنة قليلة من الدولارات، وباستثمارات عبيطة، فى التغلغل فى دول حوض النيل وفى مقدمتها إثيوبيا..

والكتاب فى مجمله يفسر أسباب ما يحدث الآن من تعنت وإصرار مجرم الحرب «أبى أحمق» ديكتاتور إثيوبيا، وسعيه لتعطيش مصر..!

المخطط قديم وأبعاد المؤامرة كانت واضحة للعيان منذ سنوات وسنوات؛ وكان يجب أن نقرأها مبكرا.. لكن من الواضح أن «أمة اقرأ».. لا تقرأ.. للأسف..!!

فضيحة علمية عينى عينك..!

فى اليوم العالمى للقبلات... أى والله القبلات، والذى وافق يوم 6 يوليو.. نشرت كل من جامعتى أكسفورد البريطانية وطوكيو اليابانية نتائج أبحاثهما العلمية عن فوائد «البوس».. وهى فضيحة علمية بكل المقاييس.. !!

فالست أم كلثوم سبقت الجامعتين وتناولت من سبعين سنة فاتت، فوايد البوس فى أغنيتها الشهيرة «قل لى ولا تخبيش يا زين»، حيث أكدت بالنص أن «القبلة إن كانت للملهوف اللى على خد الورد يطوف.. ياخدها بدال الواحدة ألوف ولا يسمع للناس كلام.. ولا يخشى للناس ملام»..!

الله الله عليك ياست.. يا كيداهم.. وسابقاهم..!!

× ياريت شركات السيارات العالمية تحذو حذو موقع البحث جوجل وتقدم هدايا قيمة لكل أسرة تطلق اسمها على أى ابن من أبنائها.. فأنا ناوى والنية لله إنى أغير اسما بنتى وأسميها «مرسيدس إس سودا بفتحة سقف موديل السنة دى»... سامعين يا بتوع مرسيدس..!!