حلت فرقة واما الغنائية المكونة من أحمد فهمي، محمد نور، نادر حمدي، وأحمد شامي، ضيوفا فى الجزء الثانى من برنامج "معكم" الذى تقدمه الإعلامية منى الشاذلى، المذاع على قناة سي بي سي.
تحدث أحمد الشامى عن دوره في حكاية "بيت عز" بمسلسل "إلا أنا"، قائلا: " في البداية عاوز أشكر شركة روما، وأستاذ مصطفي العوضي وأستاذ تامر مرتضي، وأشكر المخرج استاذ أحمد يسري".
وتابع: الدور لما جالي كان من أوله لأخره أني متحرش، وكنت متردد جدا في الدور، متحرش ونصاب ومزور، ولما اتكلمت مع مراتى قلتلها أنا مش عاوز أعمل الدور ده".
وأضاف: "كنت بفكر أعمل ولا معملهوش وكلمنى أمين جمال وقالى روح امضى بكرة أنا عارف إن الموضوع شائك بالنسبة لك، وفعلا روحت مضيت وعملت الدور، وقلنا بقى كل ما اتشتم أكتر كل ما أنا كدة نجحت أكتر".
وأختتم: "في مشهد ضربى بالقلم، كان رشدى الشامى متوتر ومكنش عاوز يضربنى، وأنا سخنته قلتله أنا راجل متحرش واتحرشت ببنتك وضربنى، ودى أول مرة في حياتى انضرب بالقلم، وطلعت برة بعد كدة دمعت لإنه شيء مهين جدا ولكن من أجل أكل العيش".
وحكى أحمد فهمى موقفا جمعه بأصدقائه في فريق واما في السابق قائلا: "زمان في بدايتنا في وقت من الأوقات كان عندنا حفل في الأردن وكل واحد قابض مثلا ألف دولار مقفول مفيش كسور، وكنا متجمعين فى غرفة نادر حمدى وكلنا جعانين بس مش عاوزين نجرح الفلوس".
وأضاف فهمى: "نادر حمدى طلب أكل وكان في مكرونة بولنيز بس هو مش بيحب ياكل العيش، فقلناله احنا هناخد العيش انت كده كده مش بتاكله ووزعنا العيش على نفسنا ووروحت مقطع لقمة واحدفها في طبق المكرونة عشان تتبل بالصلصة وأكلها".