سرد الفنان محيى إسماعيل قصة نادرة له مع الفنان أحمد زكى من كواليس مسلسل "بستان الشوك" حيث كان هناك صراع على مشاهد ضرب بالقلم وجاءت القصة كالتالى.
-هل رفضت أن يصفعك النجم الأسمر أحمد زكى في مسلسل رغم إنك صفعته ، لكن انت رفضت إن أحمد يصفع محيي ؟؟
=اه كان مسلسل اسمه "بستان الشوك" كان فيه مشهد مهم جدا لازم أضرب فيه أحمد زكى بالقلم فيمكن لأول مرة أحمد زكى كان يشوف بقى الاندماج لان انا سابقه انتي عارفة يعني انا عامل "الأخوة الأعداء" من 27 سنة يعني بداية التمثيل الصعب انا اللي حاطه ولما نقول انا اللي حاطط هذا التمثيل الصعب يبقى بنقر حقيقة مش بنجامل ولا أحب حد يجاملني في الحتة دي لان دي إضافة.. المهم اللي حصل انا كنت مندمج فأحمد سألني "هتضربني القلم ازاي؟" ، قلتله خليك في نفسك، اتعصب وقعد ينفخ وينكت في نفسه.. قلتله "فيه ايه يا أحمد؟" ، قالي "هتضرب ازاي؟!" ، قلتله معرفش القلم هييجي ازاي باليمين ولا بالشمال معرفش ، فالمهم اديته قلم غير عادي، القلم اثر فيه فزعل واتضايق وحس ان ده مش من الشخصية ان انا ضربته قلم حقيقي ، خدته على جنب وقلتله يا أحمد ده تمثيل انا كنت مندمج بس .. انا في المسلسل كنت اللورد وهو كان الكلاف وفجأة بينقلب الحال فبيبقى هو اللورد وانا الكلاف ، في المرحلة اللي ضر.بته فيها كان هو الكلاف ، جه بقى الوقت اللي هو المفروض يردلي القلم فأنا قلت انا متضربش انا محيي اسماعيل متضربش وعملت عفريت، كنت عايز أجننه بس كده كده هتضرب القلم ، فجه المنتج رياض العريان وقال لأحمد "ايه هتضر.به ازاي؟! هتضر.ب محيي اسماعيل؟! ازاي تيجي؟! حتى لو قالك اضربني متضربوش" ومثلت انا شوية اني لا يمكن اتضرب عشان اشحنه ، فالمهم احمد جه في الاستوديو وقعد ينكت وينفخ قلتله طب ماشي خلاص اضرب القلم ، قالي انا هتقمص، وأندمج وضربني قلم جامد جدا
-انا سامعة انك رفضت؟
انا في الاول رفضت بصراحة مكنتش بمثل اني رافض، انا كداب في كل اللي قتله ده.. انا رفضت فعلا ورفضت بصورة غير عادية والحق يقال اتخانقنا وقامت خناقة كبيرة جدا وبعدين بعد كده اتصالحنا وقلتله يا احمد ده تمثيل قالي "مفيش تمثيل كده، انت كنت بتضربني بالجزمة في جنبي، بوز الجزمة بييجي في جنبي فعلا هو ده تمثيل؟!" قلتله سميه اندماج.. المهم انه كل ده كان بيشحن من اللي عملته وراح ضربني قلم جامد اوي ، قلم قصاد قلم واتصالحنا وجينا حبايب وبقينا أصحاب وهو مرشحني في فيلم كوميدي ، والله العظيم عبقري، شفته في "أيام السادات" عبقري
-عجبك ؟
=بقولك عبقري ، عجبني ايه ؟! ده يعجب العالم كله ، ابداع
جاء ذلك خلال حوار محيي اسماعيل مع صفاء أبو السعود عن إمبراطور السينما المصرية "أحمد زكى"