قال الفنان كمال أبو راية إن الأدوار التاريخية هى اللى بتحبنى بمعنى أنا اللى بتطلب ليها وأنا بستمتع بأدائها مفيش عمل أنا اللى اخترته هما بيشوفوا إن أنا مناسب للشخصية فبيختارونى، وورا الكاميرا انا مش دمى خفيف بس لا أنا فوضوى و كسلان وحاجات كتير، جاء ذلك خلال مداخلة هاتفية لبرنامج اللمة تحلى على شعبى اف ام والحلقة من تقديم شيماء السباعي .
و أضاف عملت حاجات كوميدى زى عفاريت عدلى علام اتصنف لايت كوميدى، مأمون وشركاه كوميديا موقف و فيه حاجات تانية كتير و ممكن اكمل كوميدى بس للاسف الكتابة الكوميديا صعبة اصعب من الكتابة التقليدية.
وتابع الكوميديا الراقية هى الشخصية اللى تعمل أفعالا جادة ينتج عنها ضحك هى ديه الكوميديا الحقيقية اللى اتعلمناها فى المعهد زى اللى بيعملها عادل إمام ديه كوميديا حقيقية.
وعن الفنان أحمد عبد العزيز فقال أنا و احمد عبد العزيز لينا ذكريات كتير مع بعض فى سوق العصر كان بيفرهدنى احمد بيشتغل بجد اوى بيروح الاستوديو بيبقى واحد تانى خالص، و جالنا اعلان كنا هنعمل فيه مشهد من سوق العصر و مكنش عندنا مانع نعمل الاعلان طالما مش هيهدر من قيمة المشهد الحقيقى و ميبقاش تريقة عليه او هزار او يقلل من قيمته و يستاذنه شركة الانتاج و اننا ناخد فلوس كتير ديه كانت الشروط بتاعتنا لكن متوفقناش و بصراحة مكناش متحمسين اووى.
وعلق ان الحب سر السعادة وان الواحد يحب اللى حواليه و الناس اللى حواليه تحبه، ولو هتجوز شخصية تاريخية اتجوز نفرتيتى كانت شخصية مهمة جدا.
واختتم قائلا مفيش حاجة مش حابب اعملها لان الحاجة اللى مكنتش موفق فيها اوى كان ليا عذرى انا اشتغلت حوالى ١٠٠ مسلسل فلو منهم تلاتة فى ٪ اعمالها فى راضى عنها فالحمد لله، وشعبي اف ام محطة جميلة بسمعها كتير لانها اذاعة مصرية بتعبر عن نبض الشارع المصرى بشكل صادق و حقيقى و كل سنة و انتوا طيبين.