قالت نسرين أنور عكاشة ابنة السينارست أسامة أنور عكاشة، كنت عارفة إن "راجعين يا هوى" هينجح مع الناس ويقرب منهم، و بابا كان كاتب حاجات كتير أوي هو شايف فيها المستقبل، جاء ذلك خلال حوارها لبرنامج عيلتي وأفتخر ، تقديم حازم قابيل ، على اذاعة شعبي اف ام.
و أضافت بصراحة اتفاجئت بحجم قربه أوي كده من الناس من أول حلقة ومع فئات مختلفة منهم، و
أنا حاسة حواليا بمهرجان لبابا الله يرحمه، والناس كانت مشتاقة لحاجة من ريحة بابا .
و تحدثت عن والدها فقالت بابا اصلا مواليد طنطا وعاش في كفر الشيخ من وهو طفل، وبدأ ينطلق فترة صباه وشبابه في القاهرة والإسكندرية وكل المحافظات، و كان بيحكيلنا دايما إن جدو بيتعامل بمنطق ( إضرب الكبير يخاف الصغير )، و جدي كان بيوازن في شدته، فعلى قد ما كان جدي شديد على قد ماكان حنين أوي لأنه كان مدرك إن وفاة الأم محتاج يعوضها بحنية ويمكن ده اللي طلع بابا بالتركيبة دي، و عمتي كانت دايما عايشة دور الأم لأنها كانت كبيرة وكانت حنية الدنيا فيها.
وتابعت يمكن اللي فاد بابا في سكة التأليف لما والدته توفت، بابا غاص في المكتبة وقعد يقرأ فنمت عنده حتة الخيال والكتابة، و أعتقد إن جدتي هي اللي اختارت إسم بابا وكانت عايزة تجمع في الإسم بين الحداثة والعراقة، وكان فيه خلاف بين جدي و بابا لما ساب شغله في التجارة واتفرغ للكتابة، لكن
لما حصل أول نجاحات لبابا في بداية مشواره في الدراما ، هنا جدي اعترف وقاله خلاص ربنا يوفقك.
و بالمناسبة بابا إتجوز وهو عنده 22 سنة وماما كانت 17 سنة، و كان مستعجل أوي على الجواز وتكوين أسرة، بالرغم إنه كان دايما بيقول : الجواز مقبرة الحب.
ومع أول حفيد بابا تحول تماما، و هقف أوي عند علاقة بابا بعمتي ، لانها كانت بني آدمة جميلة وهي بتمثل نفس الشخصيات النسائية اللي طلعت في مسلسلات بابا زي شخصية : أنيسه نموذج الأم والأخت والعمة الحنينة .
-واختتمت قائلة بابا من كتر توحده على نفسه من صغره ماكانش بيعرف يقعد وسط لمة القرايب، ولمته كانت معانا إحنا أكتر ، ولاده وأحفاده وزوجته وأصحابه.