وجه النجم محمد هنيدى رسالة، دعم للنجم محمد صلاح لاعب ليفربول الإنجليزى ومنتخب مصر، بعد هزيمة ناديه ليفربول أمام ريال مدريد فى نهائى دورى أبطال أوروبا .
وكتب هنيدى قائلا: "عارف لما بتبقى بتلعب بلاعب فى البلاى ستشين وفجأة تلاقيك بتنافسه أو اللاعب بعد ما اعتزل بيحلل أداءك فى التلفزيون وبيوصفك بالأفضل فى منطقتك فى العالم".
أضاف هنيدى: "عشان كدة بقى عايز أقول حاجة، بقالى فترة بشوف "بعض" الشباب اللى بيحاول يسخر أو يقلل من صلاح، يمكن يكونوا مابيحبوش صلاح أو بيشجعوا فرق منافسة، من حقك ماتحبش صلاح وحقك تحب فريق منافس وتشجعه، بس الفكرة ليه تقلل أو تكره واحد قدر يعمل اللى ملايين كانوا بيشوفوه مستحيل".
وتابع هنيدى: "صلاح اللى كان بيسافر بالقطار كل يوم وينام فى النادى على الأرض وبدون واسطة قدر يصنع نفسه من الصفر، لغاية لما وصل أنه بقى ينافس على الأفضل فى العالم".
وأوضح "هنيدى": "صلاح زينا وشبهنا، ماتولدش فى بقه معلقة دهب، وقدر يكون مثال لأى واحد بيتعب وشايف أن حلمه وهدفه مستحيل يتحقق".
وأضاف هنيدى: "صلاح مثال لأى شخص مجتهد وبيمر بظروف صعبة وحياة صعبة، مثال إنك تقدر مش بس تكون الأفضل فى بلدك تكون الأفضل فى العالم، الفكرة مش فى الشخص الفكرة فى الفكرة نفسها، أن يكون عندنا شخص وأشخاص طبعا فى مجالات كتير تانية زيه، قدروا يحققوا اللى انت واحنا كنا شايفينه مستحيل، فالحب والتقدير لصلاح مش حب لشخص، حب لفكرة ونجاح، وهاردلك لصلاح".
وكان فريق ريال مدريد توج ب دورى أبطال أوروبا للمرة 14 فى تاريخه، بعد الفوز على ليفربول بهدف دون رد، مساء السبت، فى استاد دو فرانس فى العاصمة الفرنسية باريس.
وسجل فينيسيوس جونيور هدف المباراة الوحيد فى الدقيقة 59، فى اللقاء الذى شهد تألق غير عادى من البلجيكى تيبو كورتوا، حارس مرمى ريال مدريد، والذى تصدى لأكثر من هدف محقق من النجم المصرى محمد صلاح.
وشارك النجم المصرى محمد صلاح من بداية المباراة مع ليفربول حتى النهاية، وقدم أداء رائعا، لكن الحظ العاثر وقف أمام تسجيله للأهداف.
وتأخر انطلاق المباراة لمدة 30 دقيقة بسبب شغب الجماهير، حيث تواجد عدد كبير منهم خارج الملعب وعدم استطاعتهم الدخول، لاقتحام آخرين ملعب المباراة بدون تذاكر وحجز أماكنهم.