النهاردة هاأقلبها نكت..!!
النكتة بتقول إن زوجة قالت لزوجها برقّة متناهية فى ساعة صفا: بصراحة إحنا عايزين "واحدة" تانية ضروري...!
رد عليها الزوج متهللا: والله إنت بنت حلال أنا ماكنتش عارف أجيبها لك إزاي.. دا فيه واحدة عاجباني وعايز أتجوزها عليكى..!
وفجأة اكفهر وجهها وصرخت فيه صرخة أسد: واحدة إيه اللي تتجوزها يا روح النونة.. دا أنا قصدي أنبوبة تانية للمطبخ.. وعينك ماتشوف إلا النور..!
أرجوكم.. ادعوا لأخوكم فهو الآن يسأل.. ألف رحمة ونور عليه.. كان راجل طيب بصحيح وعلى نياته..!!
تذكرت هذه النكتة وأنا أتابع الجدل الدائر الآن حول الزواج الثاني.. وإصرار شيخنا الدكتور أحمد كريمة على أن تقوم الزوجة الأولى بتشجيع زوجها على الزواج عليها.. بل وأن تقوم هي بنفسها، بكل روح رياضية، باختيار الزوجة الثانية له.. شوفوا إزاي..؟!
يا جماعة.. افتكروا لنا النبي.. واستهدوا بالله كدا.. بقى العالم كله فى هم وغم وكرب عظيم بسبب الحروب والأوبئة وأزمات الغذاء والطاقة والتضخم.. وانتم مشغولين ب الزواج الثاني..؟!
آه يا أمة ضحكت من جهلها الأمم..!
زوجة تانية إيه اللي عايزين الناس تتجوزها فى ظل الغلا والكوا بتاع اليومين دول..؟!
دا الشاب من دول بعد ما بيدفع دم قلبه فى الشبكة والفرح والجهاز.. بيسافر يقضي شهر العسل فى جمصة.. لوحده من غير عروسته !!
بالمناسبة.. دي نكتة برضه بس بايخة حبتين..!!
وطالما فتحنا فى نكت العلاقات الزوجية عندي نكتة تانية.. القاضي بيسأل الزوجة: إنت ليه قتلت جوزك يا مدام..؟!
قالت له: سيادتك يا جناب القاضي تقدر تستحمل الشتايم والإهانات والضرب بالكرباج وإيد الهون ليل ونهار؟!
رد عليها: لأ طبعا..!
قالت له: وهو كمان ماقدرش يستحمل..!!
نكتة تالتة: قال الطبيب للسيدة العجوز: ياماما.. علاج حالة الاكتئاب اللي عندك هو حاجة من اتنين.. إما تتجوزي.. أو تعملي عمرة..!
ردت عليه بسرعة قائلة: يا سيدي.. العمرة ممكن نعملها فى أي وقت.. هي الكعبة هاتطير يعني..!
زوجة غبية حامل اكتشفت خيانة زوجها لها.. سألته وهي تبكي: بالله عليك قول لي الحقيقة وماتخبيش عليّ.. اللي فى بطنى ده يبقى
ابن مين..؟!!
سألها زوجها بغضب: إزاي يا ست هانم تكلمي سواقنا الهندي وإنت لابسة قميص النوم..؟!!
ردت عليه ببرود: وإنت خايف من إيه.. دا مابيعرفش عربي..!!