أموت وأعرف الدكتور «إياه» عاشق الأضواء والمنظرة عايز إيه بالضبط وهو يدعو النساء إلى التخلى عن الحجاب لأنه، كما يقول، مش مذكور فى القرآن..؟!
إيه الخيابة دى..؟! يعنى بسلامته عايز ستات مصر كلهم من أسوان لراس التين يمشوا «بلابيص» فى الشوارع علشان بسلامته ينبسط ويعمر الجمجمة ويريح العضمتين..؟!
بذمتكم فيه أكتر من كدا تطرف..؟! ما تسيب الناس تلبس اللى هى عايزاه.. إنت مالك.. إنت شغال فى جامعة الأزهر وللّا شغال فى كريستيان ديور وإيف سان لوران..!
إذا كنت شايف إن الحجاب مش من الدين خلاص ياسيدى اقنع الهانم مرات حضرتك تقلعه.. فانت مسئول عنها فقط مش مسئول عن ستات مصر كلهم..!
نصيحتى لحضرتك: شكلك بايخ قوى وإنت عايش دور رئيس المجلس الأعلى لمراجيح مولد النبى للتفتيش فى ملابس الستات والبنات..!!
نفسى أعرف هو ليه كل الجرايم اليومين دول قتل فى قتل.. يادبح بالسكين.. ياضرب بالنار..!
راح فين زمن الشتايم والشخط والنطر.. والضرب بالقلم والشلوت..؟!
راح فين زمن الردح الجميل..؟ كل حاجة اتقل بركتها.. عليه العوض ومنه العوض..!!
إيه الهرتلة دى ..؟!
إزاى يسمحوا لجمعيات، بتقول إنها خيرية، إنها تعمل صكوك للأضاحى بالتقسيط المريح على ستة شهور وسنة..؟!
فمن المعروف أن الأضاحى ليست فرضا على كل مسلم.. فهى للقادرين فقط.. فاللى مامعاهوش ما يلزموش.. فلا يكلف الله نفسا إلا وسعها..!
وبدون زعل أنا شايف إن اللى بيحصل دا تهريج وضحك على الغلابة؛ ويجب أن تقوم وزارة الشئون الاجتماعية بدورها لمراقبة الجمعيات التى تجمع أموالا من الناس تحت مسميات عبيطة.. من عينة الأضاحى اللى بالتقسيط..!
قال أضاحى بالتقسيط قال..؟! هى ناقصة هبل..!
طبيعى جدا إن وسائل الإعلام ماتهتمش بأبطالنا؛ اللى بيشرفونا دلوقت فى دورة البحر الأبيض المتوسط بالجزائر.. وجايبين لنا ميداليات بالكوم.. إيشى ذهبية وفضية وبرونزية..!
فوسائل الإعلام والصحافة مشغولين، ياحرام، لشوشتهم، فى أخبار منافسات الأهلى والزمالك فى الدوري.. وكلهم حاطين إيديهم على قلوبهم وبيدعوا: يارب تنجح ياتتح..!!
عادى فى المعادى إن أغنية من أغانى الهبد والرزع بتاعة اليومين دول تحقق لصاحبها 54 مليون جنيه حتة واحدة.. فنحن بلا فخر نعيش أزهى عصور السفه والتفاهة «وادينى فى الهايف وأنا أحبك يافننس»..!
أنا حزين للوضع الذى آلت إليه نقابة الموسيقيين.. شتائم وخناقات وتشابك بالأيدي.. وبعد أن كنا نقرأ أخبار المطربين والموسيقيين فى صفحات الفن أصبحنا نقرأها فى صفحات الحوادث..!!
إذا كان صحيحا إنهم عملوا عيش بلدى من البطاطا بدلا من القمح.. فمش بعيد بكرة يعملوا من