بدون زعل.. إقالة رئيس الهيئة القومية للأنفاق بسبب فضيحة لوحات محطة مترو كلية البنات.. قرار تأخر قليلا.. لكن على أى الأحوال أن تأتى متأخرًا أفضل من ألا تأتى أبدًا..!
إلى منتخبنا لكرة اليد: كنتم رجالة ووقفتم وقفة رجالة وجبتوا النصر لمصر.. كأس الأمم الإفريقية.. تسلم أياديكم اللى تتلف "فى حرير"..
أما إخواننا البُعدا بتوع عجين الفلاحة اللى مسمينها كورة قدم، اللى فضحونا فضيحة اللحمة البتلو فى سوق الجمعة، مثنى وثلاث ورباع.. فإيديهم بصراحة تتلف "فى حديد".. لا مؤاخذة..!!
أنا ماروحتش حفلة عمرو دياب ..!!
مش علشان العشرتلاف جنيه، حق التذكرة، لا سمح الله؛ فالفلوس كتيرة والحمد لله بس النفس اللى تصرف..!
كل الحكاية إنى بعد ما لبست أبيض فى أبيض، زى ما اشترط الهضبة، وبقت كل حاجة بيضا، حتى شعرى اللى صبغته أبيض، سامحنى يا رب، اكتشفت فى آخر لحظة إنى مش لاقى "رباط جزمة" أبيض.. فلغيت الحكاية كلها على بعضها.. وقلت أهو البركة فى باقى "الملايكة" اللى حضروا الحفلة؛ فحفلة الهضبة عاملة زى صلاة الجنازة بالضبط.. تقام بمن حضر..!!
لا أجد ما أقوله فى هذه المناسبة العظيمة إلا العبارة الشهيرة لسعد باشا: غطينى يا صفية وصوتى عليا..!!
بالمناسبة.. فيه مطرب، مش هاأقول لكم اسمه علشان ماتضحكوش، بيقلد الهضبة وبيشترط إن ماحدش يحضر حفلته إلا البنات بس..!!
نعم يا روح النونة دا على اعتبار إن بسلامتك أختهم الكبيرة الأخت "فتكات" رمش العين..!!
عيب قوى أن تتضمن أسئلة مادة الجيولوجيا للثانوية العامة سؤالا عن أسباب قيام مربى الدواجن بإضاءة لمبة للدواجن ليلاً ونهارًا..!!
بذمتكم دا سؤال يسألوه لطالب فى الثانوية "العميا"..؟!!
فالإجابة ســــهلة جدًا ويعرفهـــا أى طفل فى "كى جى ون" ؛ فالفراخ لازم يتحط لها لمبة منورة ليل ونهار لأنها "بتخاف تنام فى الضلمة"..!!
هذا السؤال فكرنى بنكتة الفلاح اللى وقفوه فى كمين ومعاه شوية فراخ.. سألوه: بتأكِّل الفراخ دى إيه..؟ قال لهم الفلاح: علف.. قالوا له: عليك غرامة خمسين جنيه.. الفلاح دفع صاغرا.. وبعد شويه قابله كمين آخر سألوه بتأكل الفراخ إيه..؟ قال لهم درة.. قالوا له غرامة خمسين جنيه..!!
بعد شويه قابله كمين تالت سألوه بتأكل الفراخ إيه..؟! فكر الفلاح قليلا قبل أن يقول: بصراحة أنا بأدى كل فرخة مصروفها فى إيدها وهى بتاكل اللى عايزاه..!!
بايخة مش كدا..؟!