أحلى تعليق سمعته مؤخرًا على الهري اللي شغال اليومين دول حول حقوق المرأة.. وأسباب ارتفاع أسعار البيض.. هو "إن البيض ارتفعت أسعاره لأن الفرخة مش ملزمة تبيض.. الديك هو اللي مسؤول"..!!
نكتة.. بس طويلة حبتين..!
الخناقة ووصلات الردح الدايرة الآن بين الشيخ الشاب "إياه" وبين الست، اللي مخها ضارب، حول أمور الدين والدنيا و"النفخ والشد.. والذي منه".. فكرني بنكتة القرد و"الحمارة"..!
فقد اختلف القرد و"الحمارة" على لون الزرع فى الغابة.. القرد بيقول إنه أخضر.. والحمارة بتقول إنه أزرق..!
احتكموا للأسد فأمر بإعدام القرد فورًا..!!
تعجب القرد جدًا، فهمس للأسد معاتبا: بذمتك مش الزرع لونه أخضر.. بتعدمنى ليه..؟!!
قال له الأسد بكل غيظ: أنا مش باأعدمك علشان لون الزرع أخضر وللّا أزرق.. أنا باعدمك لأنك جادلت "حمارة"..!!
المقربون منى يعرفون جيدًا أننى من أشد المقاطعين تمامًا لسرادقات العزاء.. فوداعي لأي عزيز يقتصر على الصلاة عليه ودفنه فقط.
فسرادقات العزاء أصبحت حاجة مسخرة خالص.. نفاق فى نفاق.. وزيطة وزمبليطة وجلسات تصوير للحضور اللي لابسين أحدث الموضات على سنجة عشرة..!!
وأقسم بالله أننى حضرت عزاء أحد كبار الصحفيين فى عمر مكرم كانوا يتبارون فيه، خلال استراحة ما بين الربعين، لإلقاء "آخر نكتة".. والضحك طبعًا كان للركب..!!
نقول إيه..؟! شعب مالوش كتالوج..!
بعد أن نشرت وسائل التواصل صورتين لراقصة شهيرة قبل المكياج وبعده.. خرجت بنتيجة مهمة جدًا وهي إن "الماكياج"، الله يستره، هو السبب الرئيسي فى انخفاض نسب الطلاق فى مصر..!!
بالمناسبة عندى اقتراح هايل هايزعل الحكومة مني ويبسط ستات مصر..!
ياريت وزارة التموين تصرف أدوات الماكياج على بطاقات التموين.. "الروج" و"الآى لينر" و"الروجاجو" بدلاً من الزيت والسكر والشاى والرز.. تحت شعار "انبسطوا ياستات وادفعى يا حكومة"..!!
إحنا جايين نهدي النفوس مش أكتر..!!
بعد النق والقر اللي شغالين على ودنه على سكان الساحل الشمالي الطيبون منهم والأشرار.. الساحل بيشهد الآن عواصف وأمطارًا وارتفاع الأمواج لثلاثة أمتار.. وتعليمات مشددة لسكانه بعدم نزول البحر نهائيًا..!!
صدق بتوع الميكروباصات لما قالوا: "عضة أسد ولا نظرة حسد".. "ماتبصليش بعين رضية بص للي اندفع فيا"..!