آدي الوزرا اللي بيفكروا خــــارج الصندوق وللّا بلاش..!!
فوزيرة الطاقة السويسرية فكّرت "خارج الصندوق"؛ وقررت أن تطالب الشعب بـ "الاستحمام الجماعى" لترشيد استهلاك الطاقة..!!
يا ليلة سودا.. استحمام جماعي..؟! دى تبقى آخر مليطة..!!
صحيح أنا بأطالب وزراء حكومتنا الموقرين بالتفكير خارج الصندوق آه.. لكن مش بالقوي كدا..!!
واضح إن وزارة المالية مش عايزة فلوس..!!
فللعام الرابع على التوالي أكتب عن الحالة المتردية لمأمورية الضرائب العقارية بمدينة الحمام المسئولة عن تحصيل عشرات المليارات من الجنيهات من سكان الساحل الشمالي الطيب والشرير.. ولا حياة لمن تنادي..!
فالمأمورية تقع فى مبنى قديم متهالك آيل للسقوط..ولا يوجد بها إلا عدد محدود جدًا من الموظفين يعملون بطريقة بدائية يدوية.. فلا يوجد بها ولا حتى جهاز كمبيوتر واحد، بتلاتة تعريفة، لتسجيل بيانات الممولين.. من دفع ومن لم يدفع..!!
وأذكر أنني تحدثت مع رئيس المأمورية العام الماضي عن هذه الحالة المتردية لمأمورية الحمام والتي تؤدى لإهدار المال العام.. فـ "عمل لى من البحر طحينة"، مؤكدًا أن الوضع سيتغير، وأن قطار التطوير سيصل إلى "الحمام" فى أسرع وقت ممكن..!
لكن يبدو إن قطار التطوير تاه فى السكة ودخل "حمامًا" آخر.. ونسى يشد السيفون..!!
أنا فرحان قوى بـ "العاركة" المنصوبة اليومين دول بين ابنة "ملك الترسو" وبين "نمبرون"..!
فابنة "الكنج" بتحذر "الأسطورة" من المقارنة بين أفلامه اللي بتحرض على العنف والبلطجة بل والقتل، وبين أفلام والدها الهادفة التي غيرت قوانين وخدمت المجتمع..
الله الله عليك يا ست.. إلهى يسترك قولى كمان وكمان علشان شبابنا يعرف التاريخ المشرف لأبطال قوته "الناعمة".. ويعرف الفرق بينهم وبين أبطال القوة "الناعقة" بتوع اليومين دول..
.. وطوبة على طوبة خللي العاركة منصوبة..!!
مش عارف ليه أستاذة الجامعة، اللي غاوية رقص، زعلانة من قرار عزلها من التدريس بالجامعة..؟!
مش حضرتك كنتي فرحانة والدنيا مش سايعاك بوسطك "اللى هو ولا وسط كمنجة.. وعودك مرسوم على السنجة" وهاتك يا رقص على الفيس بوك وخلافه بالجلابية البلدي فشر "هنومة" فى فيلم باب الحديد.. خلاص عيشى بقى وقضيها رقص ودانص.. وهيئ وميئ ودريبئ..!!
بالمناسبة.. بانضمام "دكطورة الجامعة" لطابور الراقصات فى مصر.. أصبح لدينا الرقاصة "اللى مابتفكش الخط" والرقاصة المثقفة اللي واخدة الماجستير وماشية فى الدكتوراه، والرقاصة اللى واخدة دكتوراة وماشية.. فى سكة اللى يروح مايرجعش..!!
بعد الكورونا وبعد وصول أول حالة لجدري القرود إلى مصر.. أنا شايف إنه يجب التشديد فى فرض إجراءات التباعد بكل صرامة.. فشعار المرحلة يجب أن يكون.. "ابعد حبة تزيد محبة"..!!