قال نجم الإسكواش السابق أحمد برادة: "بناتي الاتنين بيلعبوا كرة قدم وشاطرين، وهما مركزين أنهم يلعبوا في منتخب مصر، ومش خايف عليهم من ممارسة اللعبة، وأنا حبيت أنهم يمارسوا لعبة جماعية مش فردية زيي".
وتابع خلال لقائه ببرنامج "كلام الناس" المذاع على قناة "إم بي سي مصر": "بناتي الاتنين الحمد لله بيصلوا ويصوموا، من وهما صغيرين وفخور بيهم وهما اللي بيعطوني عزيمة إني أنجح في مجال البيزنس والصناعة وتحقيقي نجاحات قوية منذ دخولي قطاع الصناعة من 5 سنوات".
ولفت: "أنا كنت أهلاوي متعصب وكابتن صالح سليم الله يرحمه من الناس اللي ربتني وأنا عندي 11 سنة وأنا في لندن، وكان إنسان فوق العادة، وكنت بجري منه لما يدخل النادي وأقعد ألف وأدور علشان ميشوفنيش، وكان يقول لي تعالى ألعب معايا ويعزمني على أكل، وسألني مرة: إيه اللي جابني لندن؟! فقلت له علشان أبقى بطل العالم، فكان يقول لي هتوصل يا ابني، وقلت له مش طموحي بطل مصر، ولكن طموحي بطل العالم".
وأكمل: "اتعلمت كتير من الكابتن صالح سليم، ومرة كان الكابتن حسام حسن كابتن منتخب مصر، وفي ماتش أهلي وزمالك وقفت جنبه وعملت إني بصاحبه، فقلت له: يا كابتن صالح ما ترجع حسام حسن الماتش اللي جاي قدام الزمالك، فزعقلي وقتها، وبصوت عالي قال لي: إنت فاهم بتقول إيه؟ إنت عارف أخلاق النادي الأهلي؟ الله يرحمه اتعلمت منه كتير في الموقف ده، وفهمت منه القصة كلها".