والله العظيم عيب وحرام أن يكون هذا هو إعلام مصر، الدولة العريقة العظيمة المحورية المؤثرة فى محيطها العربى والدولى..!
معقولة..؟! الكل يعزف نفس النغمة النشاز السوداوية وهى إن القادم أسوأ.. والحياة ستكون أصعب.. وعلى الناس أن تأكل أرجل وعظام الفراخ.. وياريت يعملوا عليها شوربة وفتة علشان العيال تاكل..
فين الحلول التى يجب أن يقدمها الإعلام من خلال استضافة أهل الخبرة والاختصاص ليقترحوا لنا حلولاً علمية وعملية للخروج من الحالة الراهنة؟!
فين أفكار خارج الصندوق للوزراء وكبار المسئولين فى الدولة؟!
هل عقمت مصر كلها حتى لم يعد أمام إعلامنا إلا دعوة المصريين لأكل أرجل الفراخ وعظامها؟!
مرة تالتة ورابعة وعاشرة عيب وحرام.. والله العظيم حراااااام..!
خطورة ما يردده إعلامنا هو أن أبواق وبوتاجازات الجماعة الإرهابية، الهاربين فى الخارج، يعملون من هذا الكلام حكاية ورواية ويصورون مصر وكأنها تعيش أيام الشدة المستنصرية.. عندما أكل الشعب القطط والكلاب بل لحوم بعضهم بعضًا..!!
لا تعطوا الخونة السكين الذى يطعنون به شعبنا الطيب الآمن المطمئن.. وليموتوا بغيظهم..!!
حتى لو أقيم حفل "نمبر وان" فى موعده أو لم يقم..يكفى الإسكندرانية شرف المحاولة.. محاولة الوقوف فى وجه الفن الهابط والرقص العارى والترويج لـ "ال...."..!!
لا أملك إزاء هذه المحاولة الشجاعة من جانب الإسكندرانية الجدعان إلا أن أردد: "اقروا الفاتحة لأبو العباس ياإسكندرية ياأجدع ناس.. ياأجدع ناس"..!
بمناسبة مواجهة الفن الهابط.. أنا شايف إن المواجهة يجب أن تكون بالفن المحترم.. من خلال تشجيع الفرق الشعبية المحترمة، والتى تضم فنانين حقيقيين يحتاجون لمن يكتشفهم ويمنحهم فرصة واحدة.. من عينة فرقة "أيامنا الحلوة".. وهى حلوة فعلاً.
أما بتوع المهرجانات اللى بيحرضوا على القتل والذبح وشرب المخدرات؛ فدول لا يمكن مواجهتهم بالفن لكن بقانون البلطجة والإرهاب؛ لأن كل أغانيهم تحريض على ذلك.
عاقبوهم على ما اقترفت حناجرهم.. خلوا البلد تنضف..!!
إيه التفاهة دى..؟!!
لسه لحد دلوقت بيتكلموا فى الهيافات إياها: الست هى اللى مفروض ترضع ولا الراجل.. والهانم تبات فى بيت جوزها ولا تدور على حل شعرها.. إلى آخر الكلام اللى لا بيودى ولا بيجيب..
خلاص انتهت كل مشاكلنا ولم يبق إلا البحث عن مين اللى يحمل.. ومين اللى يرضّع ومين اللى يغير لفف العيال ويغسل المواعين.. ومين اللى المفروض يبات فى البيت ومين اللى يبات براه..؟!!
خلاص بقى فضّوها سيرة.. واختشوا على دمكم.. الناس مش ناقصة..!