أبدت الفنانة شيرين عبد الوهاب سعادتها الكبيرة بالمشاركة في احتفالات نصر 6 أكتوبر، بحضور الرئيس عبد الفتاح السيسي.
جاء ذلك خلال مداخلة هاتفية لها مع الإعلامي يوسف الحسيني ببرنامج «التاسعة» المذاع عبر القناة الأولى المصرية وإليكم أبرز تصريحاتها في السطور التالية..
- الحفلة أجهدتني من شدة الأعصاب، لإننا كنا في وجود فخامة الرئيس وكلنا كنا خافين عليه، وكانت أعصابنا مشدودة لحد ما ساب القاعة وروح بالسلامة، وبعدها كلنا هدينا وانبسطنا بالحفلة.
- يارب دايما نحتفل باحتفالات أكتوبر في وجود السيد الرئيس العظيم، اللي كلنا بنحبه ونتشرف بوجوده في حياتنا، ويا رب ما يحرمنا من وجوده في حياتنا أبدا.
- أنا معرفش أشوف الريس غير لما أقدم له التحية العسكرية، ممكن تكون الكاميرا ما جابتهاش، والحمد لله إني ألاقي دعم واستحسان من سيادة رئيس جمهورية مصر العربية، وكل القائمين على احتفالية 6 أكتوبر، واللي رجعوا لنا بلدنا بشرف وكرامة، وأعتقد احتفال أكتوبر كل البلاد العربية تفخر بيه.
- نجاحي لا يكتمل إلا بوجود جميع العناصر التي تكمل الأغاني، من ملحنين وشعراء وموزعين موسيقيين.
- أغنية "المترو" اتأخرت شوية، لكن مبسوطة بيها لإنها تجربة جديدة عليا والناس انبسطت بيها، واشتغلت فيها مع مجموعة محترمة وفنانين كبار كملت بيهم".
- إحنا لوحدنا منقدرش نعمل حاجة، وأم كلثوم مبقتش أم كلثوم غير بمساعدة كل الناس اللي حواليها من ملحنين وأدباء وشعراء، وأنا وأي فنان نجاحنا يكتمل بكل العناصر دي.
وردا على دعوة الإعلامي يوسف الحسيني، لها للظهور في البرنامج، أجابت "اللي عايزني يطلب إيدي من طارق" وأضافت: "طارق تعب معايا الفترة اللي فاتت ولسه هيتعب معايا، وكان حريص إني أوصل لكم و توصلولي".
وتابعت: "حلو يكون مسؤول عنك حد فاهم وكبير وعنده خبرة عالية، وطول ما أنا موجودة في الوسط أحب أستفيد من الناس الكبار".
وقدمت شيرين أغنية "وأنت ماشي في سينا" مع الطفل محمد أسامة.
كما قدم الفنان مدحت صالح أغنية، وشارك في أغنية أخرى مع عدد من المطربين العرب منهم نوال الزغبي وبلقيس فتحي ونداء شرارة ومحمد عساف وغيرهم من النجوم.