قالت الفنانة شيرين: "أنا ضد أن الأهالي يجيبوا 12 ملاية لـ بناتهم مع إن كفاية 4 بس، و2 تلاجة و4 شاشات و3 بوتجازات، وفي الآخر نسأل البنات ونلاقيهم مبيعرفوش يطبخوا".
وأضافت خلال تصريحات صحفية: "فيه ناس عندها موروث بيقول إني لازم أجهز بنتي بـ 24 بطانية و24 ملاية، وحاجات فوق الخيال وأنا بقول إن ده كتير على أي أب أو أي أم، في الوقت الحالي أو قبل كده، أنا ضد أي ست أو راجل تتحبس والفقر عمره ما كان عيب أنا ست فقيرة أساسا بس أنا بفكر بعقلي ولازم الواحد يكون عنده قناعة ويعلم ولاده يكون عندهم قناعة".
وتابعت: "اتكلمت مع أكتر من حالة ستات ورجالة، وفي واحد لسه هيجوز بنته، قلت له ممكن تجيب لها 4 أو 5 ملايات هي مش هتغير ملاية كل يوم، شاشة واحدة في الريسبشن كفاية مش لازم في أوض النوم قال لي طيب والناس تقول إيه قلت له إنت بتعمل علشان الناس، إذ كان على الناس جيب كراتين فاضية ومشيها على عربية قال لي يعني أضحك على الناس، قلت له عندي فكرة روح أدي مفاتيح عربيتك لصاحب العربية وروح على أي بنك أو على أي سوبر ماركت وأسرقه واتسجن ما أنت كده كده هتتسجن".
واستكملت: "اتكلمت مع واحدة متخرجة ومعاها ليسانس حقوق وبتعمل ماجستير مش عايشة هنا، قالت لي لازم نجيب 12 بطانية قلت لها هي العروسة بتتكسح مش بيكون لها إيد تغسل في الغسالة، قلت لها يا بنتي لازم اللي زيك يغيروا فكر الناس لأننا مش بالتعليم لأن الموضوع مش هزار والموضوع أصبح كبير على كل المستويات فلازم يكون فيه حل".