والله العظيم ليست نكتة.. فحتى بتوع الجرجير بيمارسوا الاحتكار فى السوق عينى عينك..!
فبدون سابق إنذار اتفق بتوع الجرجير "اتفاقًا احتكاريًا" برفع سعر حزمة الجرجير و الشبت و البقدونس بنسبة 200%.. من نص جنيه إلى جنيه ونص مرة واحدة..!
طبعا عندهم حق.. فجهاز حماية المنافسة ومنع الاحتكار سايب السايب فى السايب.. لبتوع الحديد والأسمنت والفراخ واللحمة والبيض والألبان والسكر والرز والزيت يعملوا كل اللى هما عايزينه فى السوق بدون حساب ولا حتى عتاب.. هى جت على بتوع الجرجير يعنى..!!
بالمناسبة وعلى بلاطة.. ومن غير أى لف أو دوران..أنا ضد التعديلات الأخيرة لقانون حماية المنافسة ومنع الاحتكار..!!
فالقانون الأصلى وضعه مجلس الشعب أيام الرئيس حسنى مبارك، فى "عز" قوة "الحزن الوطنى الديمقراطى".. وكانت معظم نصوصه إن لم يكن كلها تحمى الاحتكارات والمحتكرين؛ وتضع العراقيل أمام أى شخص يبلغ عن واقعة احتكار.. بل وتخرب بيته وتخسره الجلد والسقط..!!
وقد كان ذلك عاديًا جدًا وقتها؛ إذا ما علمنا إن الذى وضع القانون ببساطة هو.. أكبر محتكر فى السوق وقتذاك..!!
ورغم تعديل القانون إلا أن روحه بقيت كما هى.. لا تمنع أى احتكار ولا تحمى أى منافسة..!
لذلك أرى أن "ترقيع" القانون لا يفيد.. ولابد من وضع قانون جديد حقيقى نصوصه حاسمة، حازمة، تمنع الاحتكار وتردع المحتكرين وتشجع على المنافسة؛ التى هى أحوج ما نكون لها فى هذه المرحلة المهمة من تاريخنا.
ونصيحة لمجلس نوابنا الموقر: ما بنى على باطل فهو باطل.. ولن يستقيم الظل والعود أعوج..!!
أنا مع تطبيق الفاتورة الإلكترونية قلبًا وقالبًا؛ لأنها هتمنع اللعب فى الدفاتر وألاعيب بعض المحاسبين اللى بيلعبوا بالبيضة والحجر..
بس ياريت الجهابذة "بتوع الضرايب" يتموا جميلهم ويفكروا لنا فى طريقة لحصر المجتمع الضريبى حصرًا شاملا.. وتحصيل الضرايب من ورش وأنشطة بير السلم التى تستفيد بكل خدمات الدولة دون أن تدفع مليما أحمر للضرايب.. لأن بتوع الضرايب إما أنهم لا يعرفون عنها أى شىء؛ أو عارفين ومطنشين وعاملين نفسهم نايمين..!!
بالمناسبة.. مش عارف ليه إخواننا المحامين زعلانين من الفاتورة الإلكترونية؛ وعاملين زيطة وزمبليطة وثورة على وزير المالية وبيطالبوا بإقالته..؟!
بصراحة شكلهم وحش أوى ولا يليق بـ"القضاء الواقف"..وموقفهم غامض ومش مفهوم..
ياريت حد من نقابة المحامين يشرح للرأى العام بهدوء إيه أسباب الاعتراض؛ حتى لا يظن البعض أن المحامين على رأسهم ريشة وإنهم من طينة غير الطينة وعجينة غير العجينة..!
عجبنى أوى أشرف زكى نقيب الممثلين وهو يصرخ وبراءة الأطفال فى عينيه قائلاً: إحنا مش فاهمين يعنى فاتورة إلكترونية.. حد يفهمنا..!!
بجد يا أشرف بيه مش فاهم..؟! طب عينى فى عينك كده..!!