كشفت المطربة ياسمين علي، عن تعرض غرفتها لـ حريق، بسبب ماس كهربائي، حيث قامت ياسمين بمشاركة صورة من سقف غرفتها عبر حسابها الرسمي بموقع التواصل "انستجرام".
وكتبت عليها: "ما بحبش الطاقة السلبية والله بس اعمل ايه طيب، امبارح الساعه 2 بليل كنت قاعدة مع بابا وماما وبنتفرج عالتليفزيون قمت عشان أروح أوضتي انام".
وتابعت: "دخلت الأوضه قعدت دقيقه شميت ريحة بلاستيك محروق ومش فاهمه الريحة جاية من فين فجأة بدون مقدمات وربنا عالم باللي هاقوله (لقيت السقف علي وسعه مولع نار كله بمعني الكلمة وفجأة النار اتشفطت وبقت مختصرة فالشكل اللي انتوا شايفينه ده وقفلنا الكهرباء ورشينا ميه".
وأضافت: "كل ده ف لحظات اتاري الجار من فوق في مية بتنزل من عنده عالسقف عندنا فعملت ماس فالكهرباء وحصلت النار اللي شوفتها دي، لو ماكنتش دخلت الاوضه ف التوقيت اللي روحت فيه، الله اعلم كان حصل ايه".
واستكملت: "وقبلها بكام يوم كنا لسه عاملين حادثه بالعربية مع عربية نقل كبيرة، فما تنخدعوش بالضحك اللي بضحكه، كل واحد له فيلم عايشه، احمدوا ربنا علي كل لحظة امان انتوا عايشينها بدون ترويع وعدم ستر وماتبصوش لحياة حد ابدا من بره".
يذكر أن آخر أعمال ياسمين علي الغنائية، هو تتر مسلسل "الضاحك الباكي"، الذي يتناول سيرة الفنان الراحل نجيب الريحاني.
