الكتاب بيقول إنه إذا ارتفع سعر الدولار انخفض سعر الذهب.. لكن عندنا الدولار بيرتفع و الدهب كمان.. فماحدش أحسن من حد..!!
والكتاب بيقول إن رفع سعر الفايدة يؤدى إلى تراجع معدلات التضخم وارتفاع الأسعار.. لكن عندنا الفايدة بترتفع والأسعار بترتفع كمان وكمان..!!
والكتاب بيقول برضه إن رفع أسعار الفايدة بيؤثر سلبا على البورصة.. لكن عندنا والحمد لله.. بورصتنا لم تتأثر برفع سعر الفايدة ولا دياولو..!!
هو حل من اتنين إما إننا نكدب الكتب ونصدق اقتصادنا أو نصدق الكتب ونكدب اقتصادنا..!
أنا شخصيا مصدق اقتصادنا اللى زى الميلامين.. جامد ومتين..!!
إيه الكلام الفاضى ده..؟!!
قال إيه بيقولوا إن المطرب على الحجار لما غنى أغنية "عم بطاطا" لذيذ ومعسل كان يقصد الإنسان المصرى الصبور صاحب العزيمة التى لا تلين..؟!!
طيب اشهدوا معايا.. وتعالوا نقرأ كلمات الأغنية مع بعض اللى بتقول:
عم بطاطا لذيذ ومعسل عمره ما طاطا لغير الله
لما الدنيا بتقسى يمثل إنه خلاص سلم لقضاه
عم بطاطا يقول الراوى خبى الحكمة فى توب الحاوي
ينفخ ناره علشان إفطاره وبنكتته بيداوى بلاوى
عم بطاطا بيمشى فى حاله علشان رزقه ورزق عياله
غصبن عنه يقف يتكتف بس بكيفه يفك حباله..
بذمتكم الكلام ده ماله ومال الإنسان المصرى الصبور صاحب العزيمة التى لا تلين..؟!
قال عم بطاطا قال؟! بطلوا شائعات بقى..!!
أهو سعر القمح انخفض وبطلت حجة أصحاب الأفران.. فهل سيعيدون الرغيف وحجمه وسعره إلى ما كان عليه.. أشك طبعا ..!
فأصحاب الأفران مثلهم مثل أصحاب مزارع الدواجن ومطاعم الفول والطعمية يفعلون كل ما يحلو لهم دون أى خوف من حساب أو عقاب..!
فهم زى المثل ما بيقول "يا فرعون إيش فرعنك.. قال مالقيتش حد يلمنى".. فعلا مالقوش حد يلمهم..!!
صديقى الأديب السكندرى الكبير حسام أبو سعدة أفنى زهرة عمره فى ترجمة روائع الأدب الفرنسي؛ على نفقته الخاصة دون أن يدخل جيبه مليم أحمر واحد..!!
أعتقد إن وزارة الثقافة يجب أن ترعـــى أمثـــال أبو سعدة؛ لأنهم هم قوتنا الناعمة الذين يجب نحافظ عليهم ونرعاهم بدلا من مهرجانات الهلس والدانص والرقص على السلالم..!
بالمناسبة .. ليه وزيرة الثقافة تزيط فى الزيطة وتنضم للحملة الشرسة للهجوم على شيخنا الشعراوي..؟!
الكلام ده مالوش غير تفسير واحد وهو إن الوزيرة فاضيـــة.. وزى ماكلنا عارفـــين "الفاضى بيعمل قاضي"..!!