ميس حمدان: هيفاء وهبي مش مطربة وبتغيير مني

قالت الفنانة ميس حمدان: "حصل خلاف بيني وبين هيفاء وهبي خاصة في برنامج شكلك مش غريب على قناة إم بي سي".

وتابعت خلال الجزء الثاني من لقائها ببرنامج "في آي بي" الذي تقدمه الإعلامية أميرة بدر بقناة "هي": "هيفاء وهبي مش حابَّاني ودي حاجة ترجع لها، وعايزة تقلل مني بدون سبب أو مبرر".

وأضافت: "حسيت إن هيفاء وهبي غيرانة مني، بس هي أجمل وأنجح بكتير، ولا أقارن نجاحي بنجاحها؛ هي في حتة تانية خالص، لكن هذا لا يقلل من شأني أنا صغيرة وحلوة ومبدعة في الفقرات اللي كنت بعملها، حسيت إنها متضايقة من نجاحي".

ولفتت: "بشوف هيفاء وهبي ممثلة جيدة، بس هي عندها كاريزما قوية جدًّا، وفيه فنانين بغض النظر عن موهبتهم التمثيلية لكنهم أقوياء في كاريزمتهم زي جورج كلوني، مش ممثل قوي بس عنده كاريزما قاتلة تكفى إني تخليني أحبه وأتفرج عليه، هيفاء وهبي مجتهدة وهي ملكة الإغراء وكاريزما، ولازم كل اللي بيغنوا يدعوا لها لأنها فتحت سكة للبنات الحلوين يغنوا بثقة حتى لو صوتهم مش حلو، وهيفاء مؤدية ومش مطربة".

وأكدت ميس حمدان: "ما قُلتش ولا صرحت بإني أتمنى أعيش في زمن الجاهلية، لأنه كان وقتها كل شيء مباح، أنا مش مع الفكرة دي، وما بحبش السداح مداح، لكن تكون الدنيا موزونة وأنا بطبعي إنسانة معتدلة لا أحب أكون منطلقة وفاتحاها على الرابع ولا مقفلة".

وعن حقيقة هجومها على المطربة إليسا، علقت: "أنا كنت بعمل برنامج اسمه شكلك مش غريب، وكنت بجسد شخصية إليسا وعملتها حلو أوي لدرجة إني أنا كنت راضية عن نفسي في الأداء، وجات لي حالة من الذهول لما اتفرجت على نفسي، وكنت مبسوطة أوي، وقلت لو جابوا جن نزل وعمل إليسا ما كانش هيبقى كويس زي ما أنا عملتها ومفيش ولا غلطة".

وواصلت: "المذيع نيشان كتب وقتها ما حدش يعمل إليسا مش عارف ليه، وأنا مش بعملهم باستهزاء لكن بطريقة خفيفة ولذيذة، ونيشان قال إنها مستائة بس أنا لما قابلتها السنة اللي فاتت قالت لي أنتِ بتقلديني ولذيذة أوي وطريقتك خفيفة، والتسجيل الصوتي اللي اتسرب لي قلت إنها مش بتعني لي ومعرفهاش لأن مفيش ما بينا لا صداقة ولا عداوة وما قابلتهاش إلا في دقائق قليلة".