أبرز تصريحات أحمد حلمي في "سولد أوت"

كشف الفنان أحمد حلمي عن تحضيره لفيلم سينمائي جديد، وذلك خلال لقائه مع الإعلامي محمود سعد في برنامج "سولد اوت".

وقال: "بقالي فترة شغال على فيلم هبدأ تصويره في يناير وهو سيكولوجي عن عقد الطفولة ومشاكلها وباختصار بيتكلم عن أننا بنفتكر إننا أسوياء لكن عندنا مشاكل داخلية مش بنعرف نسلط الضوء عليها فمحتاجين نستعين بحد ومش معنى أنك مش سوي إنك شرير".

وأكد حلمي أن أبناءه لا يشاهدون أفلامه، قائلا: ولادي ما شافوش أفلامي مش مستهوياهم الحكاية.. بالرغم أني كنت بقلب في التلفزيون مرة فظهر فيلم بلبل حيران فابني سليم قالي سيبه سيبه.. فاتفرح وعجبه.. لكنهم بيركزوا في تفاصيل تانية زي اللبس والإكسسوار كالسبحة وغيرها.

وتحدث عن طفولته قائلاً: "كنت شقى جدا، كان عندنا حمار بعربة كارو دايما تحت البيت وفي مرة عضنى، وأعتقد إن ده الحمار الوحيد اللى في العالم بيعض، وروحت للدكتور وقالى أنا محدش قالى قبل كده إن عضه حمار".

وعن تعرضه للتنمر في طفولته، قال: تعرضت للتنمر بسبب "ودنى" لأن وأنا صغير كنت بثنى أذنى وأنام عليها فبقى عندى "ودن" أكبر من "ودن"، وفى مرة كنت في فرح بنت خالتى على مركب راسية، وكان في فنان كلنا بنحبه فى الفرح، وأنا كنت في فترة إعدادى تقريبا، وروحنا عشان نشوفه وواقفين قدامه وبنضحك ببراءة كدة، وراح قال لصاحبه الحق ميكي ماوس".

وعن الحلم الذي تمنى تحقيقه قبل الزواج، قال حلمي: "كان نفسي ألف العالم قبل ما أتجوز وبعد ما اتجوزت حسيت إني عايز اعمل كدة مع منى".

كما روى أحمد حلمي ذكريات أول لقاء جمعه مع النجم الراحل أحمد زكي، وقال "أول مرة شوفت أحمد زكي كنت مساعد مخرج في برنامج وكنا رايحين نغطي مهرجان الإسكندرية ونزلت أشوف أحمد زكي علشان نصور معاه وسألته عن مشهد ليه في فيلم زوجة رجل مهم وتفاصيل مشاهد ليه في عدد من افلامه".

كما حكى أحمد حلمي عن موقف جمعه مع عادل إمام في أول لقاء حيث قال "أول مرة شوفت عادل إمام كان في العرض الخاص لفيلم "لية خلتني أحبك" وأنا كنت مشارك بدور في الفيلم وأحمد عبد العزيز مدير التصوير بالفيلم هو ابن أخت عادل إمام وأنا مكنتش اعرف أن عادل إمام حاضر ولما العرض خلص اتفاجأت بيه وطبطب على وشي وقالي إنت شاطر أوي".

وعن بداياته قال: "الأستاذة سناء منصور لها فضل كبير بعد ربنا فى مشواري، ودخلته بالصدفة قابلت واحد صحبى شغال هناك كان بيشتغل في الإخراج، وقالى ما تيجى تشتغل في التليفزيون، فروحت واخدلى ميعاد عشان أقابل سناء منصور رئيس القطاع الفضائي".

وتابع ""قعدت ساعتين تلاتة ومعرفتش أقابلها عشان كان عندها شغل واجتماعات كتيرة وأخدت ميعاد تانى، وعرفتها إنى خريج ديكور وقالتلى طيب اشتغل يلا فعرفتها إنى عاوز اشتغل في الإخراج، وقالت لمحمد خلف صديقى، انزل معاه مساعد وهو كان بيخرج برنامج أطفال اسمه أحلام العصافير، فقالتله خده معاك يساعدك، وبدأت أنزل معاه مساعد".

وكشف النجم أحمد حلمي كواليس فيلم "عسل أسود" الذي عرض في السينما عام 2010، قائلا: "فيلم (عسل أسود) منى زكى قالت لي إنى مش هاينفع أعمله، ومكنتش مقتنعة عشان إن ده شخص عايش في أميركا لأكثر من 20 سنة، وأنا معيشتش هناك فمش هاعرف أعمله وكمان اللغة".

وتابع: الفيلم كان المفروض يعمله عمر الشريف، وأنا كنت هابقى موظف في شركة، ولكن لما قرأت السيناريو، قلت لخالد دياب إيه رأيك نخليه أكتر عن الشباب، ونلقي نظرة عن الشباب اللى هاجر بره، وفكر في الموضوع وقال لي ممكن نعمل كدة وبدلنا السيناريو.

وأضاف: كل شيء كان يقول إنى منفعش ولا شكل ينفع ولا لغة تنفع ولا تفكير شخص يكون عايش سنين في أمريكا، وقعدت مع واحد مصري كان عايش في أمريكا اسمه آدم، واستعنت بيه في قراءة السيناريو وأقول له على المواقف في السيناريو، وأشوف رد فعله وموقفه إيه لو حصل له حاجة من الموجودة في السيناريو، وعشان كدة الفيلم بيعبر شوية عني لإني عيشت بره مصر فترة كبيرة بعيد عن بلدي.

الموسم الجديد من البرنامج يتم عرضه حصريًا على قناة ‏"CBC" فى تمام التاسعة مساء يومى الخميس والجمعة من كل أسبوع ويستضيف نخبة من كبار نجوم الفن فى مصر والوطن العربى، ويجوب خلاله محمود سعد فى جميع محافظات الجمهورية بحثًا عن حكايات جديدة ومختلفة لأماكن وشخصيات ملهمة، بجانب تقديمه لعدد من الحفلات والليالى الغنائية المتميزة.

يتميز كل عرض من sold out بتجربة فريدة، حيث لا يتم تكرار العرض مرة أخرى ويعرض مرة واحدة فقط على أحد المسارح ليتم تغييره في العرض الذي يليه، وينقسم البرنامج sold إلى ثلاث فقرات رئيسية، وهي العروض الكوميدية Standup Comedy ويقدمها محمد حلمي وعلاء الشيخ ويستضيفا أحد صناع المحتوى الكوميدي من الشباب، يليها فقرة يقدمها الإعلامي محمود سعد مع أحد نجوم الفن والغناء.