الدمعة كانت هاتفر من عيني وأن أتابع ما أكد عليه دولة رئيس الوزراء في المؤتمر الصحفي الذي عقده، بعد الهدية اللي "إداها" للشعب، وهو إن الحكومة تنحاز للمواطن البسيط في كل ما تتخذه من إجراءات..!
أنا شخصيا شايف، بعيني اللي هاياكلهم الدود، إن رفع أسعار الكهرباء والمياه وتذاكر القطارات كلها تصب في صالح المواطن الغلبان.. حد عنده رأي تاني..؟!
سامحني يا رب.
الناس اللي هاتخش جهنم حدف بيسألوا وبراءة الأطفال في أعينهم: هو فين بقي السكر أبو عشرة جنيه ونص اللي قال وزير التموين إنه هايتوفر في أول يناير..؟!
يا جماعة اتقوا الله في مصر.. السكر كان جاي في السكة بس السواق اللي كان سايق عربية السكر، الله يسامحه، راحت عليه نومة.. فتاه في السكة.. ياحرااااام..!
فأصدر وزير التموين قرارا وزاريا بتسرّيح كل موظفي الوزارة اللي مالهمش لا شغلة ولامشغلة.. بميكروفونات في الشوارع والحارات يدوروا علي السكر التايه.. وبينادوا سكر تايه يا ولاد الحلال.. اللي يلاقيه يبلغ وزير التموين والأجر والثواب علي الله.. يا عدوي..!
بالمناسبة..إنتو بتحاسبوا وزير التموين علي إيه..؟!
الراجل عداه العيب وقزح ومقالش أي حاجة غلط؛ فهو قال فعلا بعضمة لسانه إن السكر هايبقي بعشرة جنيه ونص في أول يناير .. لكنه ما قالش يناير سنة كام..؟!
إيه الهرتلة دي..؟!
إزاي يسيبوا بعض المجانين والمهووسين يحدّفوا الناس اللي ماشية، في أمان الله، علي كورنيش الإسكندرية بالطوب وقزايز المايه.. قال إيه ..؟! احتفالا بقدوم السنة الجديدة..!
حدث ذلك الساعة 11 مساء يوم الأحد الماضي ولمدة ساعة كاملة وسط غياب كامل لأجهزة الأمن وأجهزة المحافظة..!
أرجو ألا تمر تلك الواقعة مرور الكرام؛ ولا بد من محاسبة المهووسين والمجانين والمتقاعسين عن منعهم؛ فالبلد مش ناقصة هطل.. لا مؤاخذة..!
البعض زعلان من المصنفات الفنية لأنها سمحت لمطربة العجلة بعمل أغنية «أبيحة» خادشة للحياء العام..
يا جماعة الخير.. الأغنية دي بالذات لا تدخل في اختصاصات المصنفات الفنية.. لكنها من اختصــــــاص.. شــــرطة الآداب..لامؤاخذة..!