أجاب الدكتور علي جمعة مفتي الديار المصرية السابق، على سؤال طفلة حول ليه الزوجة مجبرة على طاعة زوجها، وعدم طاعة الست للراجل تأثم عليها ولو هو غير موافق على صيامها يبقى باطل؟.
وقال الدكتور علي جمعة مفتي الديار المصرية السابق، خلال حلقة برنامج "نور الدين"، المذاع على قنوات الشركة المتحدة للخدمات الإعلامية، اليوم الإثنين: "مين اللي قالك الكلام ده أنتم جابين معلوماتكم منين، وبتقولوا حاجات غريبة جدًا الله يكون في عونكم".
وتابع: "إحنا في الحياة الدنيا، أي واحدة ست لها كل الحقوق والخيارات وكل حاجة، وكمان الراجل له كل الحقوق والخيارات وكل حاجة، إلا لما يتدخلوا في الزواج بقيوا في شركة وأسرة فيها دوائر متعارضة يجب ترتيبها علشان الحياة تمشي".
وأضاف: "الشرع حرم إجبار الفتاة على الزواج من أي شخص لا تريده، حضرتك كأنثى أنتي حرة، لكن إنتي أردتي الزواج علشان في دافع أمومة جواكي وعندك دافع تكوني ربة منزل، ده اختيارك بقى في بني آدم تاني فهو مش كيس جوافة، مش عاوزين واحنا بندي المرأة حقوقها ندهمس على الرجالة".
وأوضح: "قائد السفينة في البيت يكون مين لازم يكون حر الحركة، الاستاذة حملت وولدت ونفسه، وتعاين الموت وهي بتخلف، وعندنا إحدى الكاتبات قالت ده كلام سليم وعملت رواية تعترض على ربنا، طيب عاوزين إيه مفيش ربنا، طيب مفيش ربنا هتبقى الدنيا مقلب وسودا".
ونوه: "الشركة لازم يكون ليها قائد يكون مسئول عن النفقة والرعاية والحماية وستات الأرض كلهم بتحب كده، إنما يحصل أمتى لما يحصل خلاف وتكون عاوزه تمشي اللي في دماغها، وكل ده محتاج إلى تعديل حتى نصل إلى سعادة الدارين، وبقى وأنا بشتغل مبسوط، وساعات مش بنكون منصفين".
برنامج نور الدين، الذى يعرض على قنوات الشركة المتحدة، يفتح حوارًا مع الأطفال والكبار حول تساؤلاتهم حول الدين والله عز وجل، إضافة إلى المشكلات الحياتية التى تواجه عباد الله وكيفية التغلب عليها، ويرد على أسئلة للمرة الأولى على لسان أطفال صغار، دومًا ما يسألوها لأهاليهم الذين يجدوا نفسهم فى حيرة من أمثلة فين ربنا، مش بنشوفه ليه، وغيرها من الأمور الذى يقف الآباء أمامها فى حيرة شديدة دون إجابة ما جعل البرنامج محل ترقب سواء للأهالي الذين ينتظرونه لفهم الإجابة الصحيحة، أو الأبناء الذين سيجدون فى البرنامج فهمًا لما يحاولوا معرفته ويثبتهم بصورة صحيحة ما يبنى عندهم وعيًا ويقينًا.