طارق الدسوقي : أنا مش متواجد لأن معاييري صارمة

كشف الفنان طارق الدسوقي سبب غيابه عن الساحة الفنية طوال العشر سنوات الماضية، موضحًا أن هناك فجوة بين المنتجين والمخرجين الحاليين والجيل القديم.

وقال طارق الدسوقي، في لقائه مع الإعلامية إنجي هشام ، في برنامج "المنسي" المذاع عبر شاشة قناة هي : أنا مش متواجد بسبب أن أنا فعلًا بحط لنفسي معايير جادة وصارمة جدًا في اختيار أعمالي، والفترة من 2011 لـ 2016 معظم الأعمال اللي كانت بتتقدم لا تمثل هويتنا ولا قيمتنا ولا ثقافتنا ولا منظومة الأخلاق اللي بتميزنا، ولما الدنيا بدأت تتصلح لقيت أن معظم المنتجين والمخرجين اللي موجودين دلوقتي أنا معرفهمش ومبيجهدوش نفسهم يدوروا وبياخدوا اللي قدامهم.

وتابع: مجموعة كبيرة من الكتاب والمخرجين فاهمين الموضوع غلط، وأن الإخراج هو الإبهار في الصورة واستخدام تكنيك حديث، وأن أنا أشد الناس بأي شكل، ونفس الكلام في ورش الكتابة دلوقتي، ومبقاش في ارتقاء بلغة الحوار، وده بيأثر على اختيارهم للممثلين.

وأضاف: بقى في استسهال وكله عايز يخلص تصوير بسرعة، ومعظم الأعمال دلوقتي بتتصور قبل رمضان بشهرين تلاتة وبيجيبوا وحدة تصوير تانية ومخرج تاني ويقعدوا 24 ساعة في الاستوديو.

برنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام العاشرة مساء، طوال شهر رمضان، ويحل عدد من نجوم الفن ضيوفًا على البرنامج، للحديث عن بداياتهم وتفاصيل مشوارهم والتحديات التي واجهتهم على مدار مشوارهم الفني.

https://youtu.be/brb9FxL_cgg?si=LQcah70pT4_Iiwye