كتب - أحمد حمدي
أعلنت شركة السبكي التي يمتلكها أحمد و كريم السبكي عن تعاقدها مع «حمو بيكا»؛ للمشاركة في أحد أفلامهم السينمائية الجديدة.
ونشر المنتج كريم السبكي، صورًا له، وهو يوقع عقد التعاون مع «بيكا» ضاربًا عرض الحائط بقرار نقابة الموسيقيين الذي منع بيكا من مزاولة الغناء أو إحياء أي حفلات غنائية.
وتوالت ردود الأفعال الغاضبة عبر موقع التواصل الإجتماعي وعبر الجميع عن غضبهم ورفضهم لمثل هذا القرار، الذي يفسد الذوق العام، و يجعل التمثيل مهنة لمن لا مهنة له، وأعتبره آخرون خطرًا على الأمن القومي، على اعتبار أن التمثيل من أهم الأدوات المشكلة للوعي المجتمعي.
يقول المنتج «حسني محمود» هو إنتوا ليه زعلانين إن حمو بيكا مضى مع السبكي؟ السبكى من حقة يمضي مع أى حد حس إنه إتشهر وعامل جماهيرية، حتى لو لمجرد التريقة عليه، الناس هتشوف العمل عشان تضحك و تتريق وتحلل و تكتب بوستات، وده اللى بيدور عليه السبكى ومن حقة ومحدش يقدر يلومة، بس اللوم هنا على مين؟ على اللى خلى السبكي يشوف حمو بيكا أصلا .. اللى هما مين؟ كل واحد عمل شير .. كل واحد كتب بوست وحط فيه فيديو ساقط و تافه وخلاه تريند .. كل واحد شارك و كان سبب فى إن الناس تعرف حمو بيكا .. هو السبب إن السبكي أوغيره يمضى معاه .. زى ما عملتوا فى اللي قبله وأمثاله كتير، طالما فيه مواهب أمامكم مبتعملوش ليها شير ولا بتتكلموا عنها، و بتعملوا بس للفشل والتفاهة، هيفضل الذوق العام في تراجع وهيفضل النجاح لأشخاص لا عندهم موهبة ولا أسس ولا علم ولا أي شىء، زعلانين ليه ؟ دى النتيجة الطبيعية لعمايلكم، إنتوا اللي وصلتوه هو وغيره لحاجة مكنوش يحلموا بيها، عيطوا على الذوق العام اللى هيشعوا ولادكم من بعدكم، وإتعلموا، ده لو كنتم ناويين تتعلموا».
وأصاب الأحباط طلاب وخريجي أكاديمية الفنون وأقسام المسرح بالجامعات المصرية، يقول «محمد نبيل منيب»، أبارك للزميل حمو بيكا تعاقده مع شركة السبكي فيلم، ألف مبروك، أصبحت زميل لـناس بتتعلم و بتكافح من سنين .
و يقول «سمير بدير» ألف مبروك للفنان القدير حمو بيكا على الفيلم الجديد، وأتمنى أنه يتبنى المواهب المحدودة اللي زي أمثالي و ياريت أقف قدامه في يوم من الأيام، كأي حاجه غير اني أكون ممثل لأني أكيد هبطل، رايحه بينا على فين يا مصر.
وعلقت رانيا يحيى عبر حيابها على فيسبوك قائلة: حمو بيكا مضى مع السبكي و لا عزاء للموهوبين والورش والكاستينج والأمل والإحباط و الفرحة بالنجاح، والزعل علي كبت الموهبة، برافو عليكم كواحدة دارسة ماركتينج بقولهم برافو عليكم بس كواحدة اشتغلت في مطبخ المجال وبتشوف وبتعيش لحظات يأس صحابها الموهوبين بجد، ومش واخدين فرصة بسبب الشلل و العلاقات بقولكم إن في ناس هتحلل لنفسها الإنتحار من حسرتهم ..ها !! شيرتوا واتريقتوا وصنعتوا نجوم من إزاز و دفنتوا الألماظ !!».
و ألقى آخرون اللوم على وزيرة الثقافة ونقيب المهن التمثيلية، بإعتبارهم مسئولين عن ما يقدم من مضامين فنية، مؤكدين أن ظهور حمو بيكا سيدمر الأجيال القادمة ثقافيا، و يقع اللوم الأكثر على أشرف زكي بإعتباره رئيسا لأكاديمية الفنون و نقيب المهن التمثيلية، في حال موافقته على ما يحدث، و سيواجه غضبًا من أعضاء نقابة المهن التمثيلية «الجالسون في بيوتهم دون عمل و هم كثر» و طلاب و خريجي الأكاديمية الذين أصابهم الإحباط و الحسرة.
منذ فترة ويحتل اسم المطرب حمو بيكا، ترندات مواقع التواصل الإجتماعى، لاسيما بعد إنتشار عدد من أغانيه، التي تنتمى إلى نوعية أغانى المهرجانات الشعبية، و كذلك خلافه مع مجدى شطة، وإلغاء حفلاته، كل هذا جعل منه إسماً يتردد و ينتشر عبر مواقع التواصل الإجتماعي.
وعلى الرغم من حصول أغانيه على موقع "يوتيوب" على نسبة مشاهدات عالية، إلا أن هناك حالة من الهجوم يشهدها حمو بيكا؛ بسبب ما وصفه البعض فى المساهمة بتدنى الذوق الفني لدى المصريين.
وإنتشرت مؤخراً عدد من الصور لحمو بيكا قبل شهرته، فظهرت له صورة خلال عمله جزارًا، وصورة أخرى تظهر تواجده كسائق في إحدى سيارات الكسح.