دافع الإعلامي عمرو أديب عن النجم أحمد حلمي، بعد الانتقادات التي وجهت له مؤخرا بسبب طبيعة الدور الذي يلعبه في فيلم جديد يحمل اسم "النونو".
وقال عمرو أديب في فيديو عبر حسابه في موقع "إكس": "في لجان مخصوصة ومدروسة ومدسوسة شغالة على الموضوع ده، وسمعة مصر و أحمد حلمي وإنه إهانة للشعب المصري، وطبعا إحنا عارفين إن ده مضروب ومدبر وأغلبه متظبط، وطبعا في ناس ولاد حلال عايزين يقفوا جنب البلد وينقذوا البلد ويدافعوا عن كرامتها".
وأضاف: "أنا عايز أسأل سؤال، هو أحمد حلمي ده مش ابنكم وأخوكم وصاحبكم؟ هو أحمد حلمي إتولد من الحيطة؟ أحمد حلمي موجود من زمان يا جماعة وعمل مليون فيلم، فجأة تقرر إن أحمد حلمي باع بلده ودينه وحياته علشان شوية ريالات!"
وتابع: " أحمد حلمي لما عمل عسل إسود وقتها كان أحمد حلمي برضه، وطبعا في ناس عايزة تولع الدنيا وتخليها تعبانة وفيها توتر مهما الدنيا هديت وبقت لطيفة".
وأشار عمرو أديب إلى أن دور النصاب الذي أثار الجدل حول الفيلم ليس جديدا على السينما المصرية قائلا: "دور النصاب في الفن المصري والسينما المصرية موجود من زمان، ولن أذيع سرا في داخل الفيلم نصاب سعودي، وكل الشعوب في الدنيا عندها نصابين وناس كويسة وناس وحشة، وإنت طالع تهاجم قبل ما تشوف الفيلم وتعرف الحكاية".
وأكمل: "ولاد رزق الجزء الأول والثاني كانوا نصابين، والفن فيه كل حاجة ومش دوره بس يوري الإنسان الكويس الطيب، الفن دوره كمان يبين المشاكل والمصايب، أرجوكم اهدوا واحكموا على العمل بعد ما تشوفوه".
وكان المستشار تركي آل الشيخ، رئيس الهيئة العامة السعودية للترفيه، أعلن مؤخرا عن تحضيره لفيلم من بطولة أحمد حلمي يحمل اسم "النونو".