اسمحولي أعرفكم بنفسي.. أنا بلوجر، آه بلوجر.. أو بحاول أكون بلوجر، وزي ناس كتير بس كلنا بلوجر بمعناه الحقيقي مش من اللي بيجروا وراء الترند عشان يوصلوا، ولا من اللي بيعملوا أي محتوي حتي ولو علي حساب سمعتهم وكرامتهم.
خليني أتكلم عن نفسي.. أنا بلوجر أقدّم محتوي هادفًا؛ أفكّر، أقرأ، وأكتب، وأحاول دائمًا أن أقول شيئًا يحمل قيمة، قد ينير لك فكرة، يفتح أمامك طريقًا، أو يجعلك تري نفسك بطريقة مختلفة.
عملت محتوي بعنوان صحفي أفندي وعملت فيه البطل اللي بيتصدي للمشكلات وعملت محتويات كتيرة، بس المشكلة ولا لايك ولا شير ولا حتي كومنت فيه "برافو يا معلم".
أنا بتكلم، وبحط قلبي علي الشاشة، وبسحب المايك.. بس المشاهد مفيش وبحس أن القاعة فاضية.
كل الناس مشغولة بالهيافة، وبقي الطبيعي إنك تشتهر لما تعمل حاجة ملهاش معني، لكن تحاول تعلِّم، تنصح، تحفّز، مش هتلاقي حد يبصلك ومشاهدينك يتعدوا علي الصوابع..بس علي فكرة.. أنا مكمل.
هفضــل أتكلــم، وهفضــل أقـــدم محتوي هادفا، حتي لو المشاهدات صفر، وحتي لو آخر تعليق جالي كان "مفيش دم خالص".
مش علشان الشهرة.. علشان يمكن حد يسمعني بالغلط، ويتغير.
يمكن أكون سببًا في حاجة حلوة.
وفي الآخر.. مش كل الناس اتخلقت تتفرج، بس أنا اتخلقت أتكلم.
وأنت؟ جرب تسمع.. يمكن تتعلم.
رسالتي لمن من الله عليهم ب الشهرة اعلموا أن الشهرة أصبحت سلاحًا ذو حدين.. ممكن تكون باب خير وأجر، وممكن تتحول لأداة هدم للوعي والأخلاق. ضع أمامك هدفًا واضحًا يفيد مجتمعك، وينفع دينك، واكسب قرشك بالحلال.
واعلموا أن التأثير الإيجابي يبدأ من المحتوي، فبدل أن تلهث وراء الترند الفارغ، أبحث عن القصص الحقيقية التي تمس الناس، عن المعلومات المفيدة، عن القيم التي نفتقدها وسط ضجيج السوشيال ميديا. اجعل من المحتوي الذي تصنعه نصائح صحية، أو أفكار لتطوير الذات، أو تجارب نجاح لأشخاص بدأوا من الصفر.
واعلم أن المتابعين ليسوا مجرد أرقام، بل هم أشخاص يتأثرون بما تقدمه لذلك حاول أن تكون صادقًا، معهم ضع بصمتك في حياة الناس، واترك أثرًا طيبًا يجعلهم يتذكرونك بالخير، وأن تستثمر شهرتك لخدمة المجتمع، لا لإشعال الفتن أو نشر السطحية.
في النهاية، النجاح الحقيقي ليس في عدد المشاهدات، بل في عدد القلوب التي ساعدتها علي أن تري الحياة بشكل أفضل.