فنانة تصاب بفيروس كورونا فى مصر

كتب: أحمد جمال

نشرت الممثلة المصرية، إيناس عز الدين، عبر بث مباشر على صفحتها على “فيس بوك”، خبر إصابتها بـ فيروس كورونا المستجد قبل قليل من مساء اليوم الأحد. وأعلنت الممثلة، إصابتها بالفيروس، قائلة:  “الحمد لله حتى الان انا حالتي مستقرة إلى حد ما وفي حجر منزلي لوحدي ومش بختلط بأي شخص وبلتزم بالإجراءات الوقائية المُتبعة وكل ده طبعًا بالمتابعة مع وزارة الصحة إلا إذا الحالة ساءت ساعتها بيحصل عزل طبي في أحد مستشفيات الحجر الصحي وده الإجراء المتبع من قبل وزارة الصحة معايا ومع ناس كتير وده بروتوكول مُتبع في العالم كله مش في مصر بس أن الحالات السيئة بس هي اللي بتدخل عزل صحي في مستشفيات ومافيش حاجة أسمها لو مريضة أنزل أي مستشفى عادية جنب بيتي."

وواصلت حديثها قائلة : "نزولي المستشفى وأنا مصابة معناها أني هعدي كل شخص في طريقي ومافيش مستشفى مجهزة أنها تستقبل حالات إلا المستشفيات المخصصة من قبل وزارة الصحة ودي الوزارة اللي بتحول عليها الحالات اللي محتاجة أنها تتعزل في مستشفى والفايرس ليه درجات فيه درجات بتتابع من البيت مع وزارة الصحة وبيتعملها حجر صحي منزلي وفيه حالات بتتدهور فبيدخلوها العزل الصحي بالمستشفيات، وده نظام متبع في العالم كله وانا حالتي تستدعي الحجر المنزلي حتى الان الحمد لله".

وتابعت إيناس عز الدين، "الأعراض معايا كحة جافة جدًا نشفان ريق الم شديد في الحلق مع صعوبة في البلع والم بحرقان شديد في منطقة الصدر كأن طوبة على الصدر وهن وضعف شديد والم في الجسم مع صداع ودوخة بسبب عدم وصول الاوكسجين بشكل كافي بسبب صعوبة التنفس مافيش حرارة حرارتي مش بتاخطى ٣٧ ونص وده لان الجسم لسه ما وصلش للمرحلة اللي يتهاجم بشدة من الفايرس فتبدأ الحرارة ترتفع علشان تهاجم الفيروس".

وأكملت "مفيش اي داعي للذعر ولا نشر الهلع بين الناس ابدااااااااًا ولا فيديوهات صريخ وصويت ولطم كل ده بيخوف ويرعب الناس وبيخلي فيه طاقة سلبية تخلي ناس كتير من الخوف تتوهم المرض وتخلي المناعة تضعف لان العامل النفسي بيرفع المناعة".

وختمت: زي ما قولت في الفيديو توخوا الحذر واعملوا اللي عليكم ولكن دون فزع او نشر هلع بين الناس لان الناس فعلًا مش متحملة انشروا طاقة ايجابية وكلموا الناس عن كام حالة اتحولت من ايجابي لسلبي وكان حالة خفت وخرجت من المستشفى وكام حالة عملت حجر منزلي وحالتها كانت بسيطة و اتحسنت وهي في بيتها.. الحمد لله حتى الان انا حالتي مستقرة الى حد ما و في حجر منزلي لوحدي ومش بختلط بأي شخص وبلتزم بالإجراءات الوقائية المُتبعة".

https://www.facebook.com/enas.e.eldeen/posts/10159823968273298