لما تبقى القاهرة، هي بؤرة اهتمام العالم، والكل منتظر نتائج تحركاتها لإنهاء العدوان الإسرائيلي على الأراضي الفلسطينية، والرئيس الأمريكي جو بايدن، يتصل بالسيد الرئيس عبد الفتاح السيسي، ويقول أن واشنطن بتعول على جهود القاهرة لوقف إطلاق النار في غزة، يبقى لازم ترفع راسك فوق وتقول أنا مصري..
مش بس الرئيس الأمريكي، كمان أنطونيو جوتيريش، سكرتير عام الأمم المتحدة، اتصل بالسيد الرئيس امبارح، علشان يقول إن الأمم المتحدة بتساند الجهود المصرية لإنهاء الأزمة ووقف العنف في الأراضي الفلسطينية.. طيب ليه كل الاتصالات دي حصلت امبارح، لإن علشان كل الأطراف الدولية عارفة أنه مصر هي السؤال والجواب في المنطقة، ولو عايز تعرف الجواب، كلم مصر..
بالفعل مصر كان عندها الجواب، وأعلنت بشكل رسمي إنها توصلت لاتفاق بوقف إطلاق النار فجر النهارة الساعة 2 صباحا بتوقيت غزة، يعني من 5 ساعات تقريبا، ومش بس كده، ده كمان مصر هي اللي هاتراقب وقف إطلاق النار من الجانبين.. فيه وفود أمنية مصرية هاتكون موجودة في تل أبيب وفي الأراضي الفلسطينية، علشان تتابع إجراءات تنفيذ وقف إطلاق النار، وكمان تتفق على الإجراءات اللي هتحصل بعد كده علشان تحافظ على استقرار الأوضاع بصورة دائمة..