دافعت الفنانة هالة صدقى عن الفنانات اللاتى تعرضن لهجوم شرس بسبب حضورهم حفل زفاف بعد ساعات قليلة من جنازة الفنان سمير غانم بتعليق قوى عبر صفحتها على موقع التواصل الاجتماعى فيسبوك.
وقالت هالة صدقى : زي ما العزاء واجب الفرح كمان واجب ،الفرح يوم في العمر وخصوصا لو حد عزيز عليه جدا ومنتظر اشاركه اللحظه دي ،المعروف جدا أن اي فنان وأولهم الراحل الفنان سمير غانم كان بينزل يعرض ويضحك ويسعد جمهوره لكن قلبه من جوه كله حزن وأكبر مثال النجم الكبيرعادل امام دفن مصطفي متولي صاحبه وجوز أخته الظهر ونزل يعرض بليل وبما بعد ما نزلت الستاره انهار ،ومش عادل بس لا في غيره وغيره وغيره .
واكدت هالة صدقى : للاسف الفنان بيبقي مطلوب منه فوق طاقته وأصحابه وحبايبه منتظرين منه اكتر ،عمر الحزن ما كان بلون الاسود او البكاء ،ولاد سمير النهارده لابسين ملون علشان مامتهم ما تعرفش باللي هما فيه هل ده معناه انهم مش زعلانين ومقهورين علي باباهم ،وهي قدرات ممكن حد يقدر يتغلب علي أحزانه وناس لا.
وكشفت هالة صدقى : وعلي فكره أنا مكنتش معزومه علي الفرح اللي زملائي كانوا فيه ،كنت معزومه في فرح تاني خالص والنهارده كمان كان عندي فرح حد من أعز أصدقائي ،كلنا عارفين الأصولل ان لما حد يموت نقفل التلفزيون وبلاش مزيكا وحاجات كلنا عارفينها، لكن للأسف في ظروف خارجه عن الإرادة وبدل ما نحاسب البشر واحنا عندنا رب هو المسئول عن اللي في القلوب ،ندعي للزميله والاخت العزيزه دلال ان ربنا يقومها بالف سلامه وترجع لبيتها وولادها وتتحمل فراقها لحبيب عمرها شكرا لتفهمكم.