كتبت فتاة تدعى "نهال سليمان" على حسابها الشخصي بموقع التواصل الاجتماعي "فيسبوك"، إن الفنان أحمد سعد ضرب شابا بالقلم في بنزينة ومزق ملابسه.
وقالت نهال: "النهارده كنت في بنزينة إمارات مصر جنب داون تاون و شوفت شاب صغير .. في العشرينات كان معدّي من ورا عربية BMW x5/6 بيضة و العربية كانت بترجع بسرعة وكانت هاتخبط الولد، فا الولد كرد فعل طبيعي قاله "خلي بالك وانت راجع يا حبيبي".
وتابعت نهال : "اتضح إن اللي كان راكب العربية الفنان "البلطجي أحمد سعد" راح عليه وقاله "بتكلم مين كده يلا؟" فا الولد رد عليه قاله "يلا؟ بكلمك انت" وطبعاً الكلام ماجاش على هوا ولا على كرامة احمد سعد اللي ضرب الولد بالقلم قدام أمه وأخته والناس كلها في ال بنزينة ووقعه عالأرض قدام عربيتي بالظبط و قطعله تيشرته، وكان رد فعل طبيعي مني أنا وأختي حاولنا نوقفه بالكلام فا رد علينا بشتايم قذرة جداً وابتسملنا ومشي بالعربية".
وأضافت "نهال": "الموقف ده بينلي قد إيه احنا بندي قيمه لاشخاص ماتستاهلش وبنسيبهم يعيشوا وسطينا عادي جداً".
وقامت "نهال" بتحديث المنشور، قائلة: "الشاب اللي البلطجي اعتدى عليه كلمنا و عرفنا منه انه رجعله و اعتذرله انه "ضربه" و الموضوع خلص".
وأضافت "نهال سليمان" : "بس بالنسبالي الموضوع ماخلصش و انا بحكي موقف شوفته و تم التعرض عليا أنا وأختي فيه بالشتيمه، فا البوست هايفضل موجود لحد ما البلطجي ده ياخد عقابه".
