قال إيه فى اليابان عقد مسئولو السكك الحديدية مؤتمرا صحفيا اعتذروا فيه للشعب علشان قطار اتأخر دقيقة واحدة بس..!!
وأقام المسؤولون اليابانيون الدنيا ولم يقعدوها، وتوعدوا سائق القطار بأشد العقاب..!!
بصراحة اليابان محبكاها حبتين.. إيه يعنى لما القطر يتأخر دقيقة ولو حتى ساعة أو ساعتين.. هى الدنيا طارت..!
طب دا إحنا عندنا فى مصر، القطر من دول بياخد قطر تانى بالحضن، ويموت ويصاب العشرات ومفيش مسئول واحد، من الوزير للغفير، يطلع يعتذر للشعب..!!
قال يعتذروا قال.. الكلام ده عندها.. قصدى اليابان طبعا.!!
مليون تحية لوزارة الصحة التى أغلقت سبعين منشأة طبية مخالفة فى الدقهلية والمنيا والفيوم، ويا ريت الوزارة تتم جميلها وتقفل لنا المستشفيات المخالفة فى القاهرة، خاصة بعض مستشفيات الخمس نجوم، بتهمة الغش وانتحال صفة.. فهى مترخصة على الورق مستشفيات، لكنها فى الواقع تمارس أعمال الجزارة.. من دبح ونفخ وسلخ وتقطيع.. ويا ويله وسواد ليله اللى يوقعه حظه فيها، لأنه سيدخلها على رجليه ويخرج منها محمولا على الأعناق.. وحدوووووووه..!
مش عارف أصدق اتحاد الغرف التجارية اللى بينفى نفيا قاطعا ارتفاع أسعار تسعين سلعة أساسية فى السوق، على رأسها اللحمة والفراخ، ولاّ أصدق الفرارجى والجزار والفكهانى والبقال وبتاع الخضار اللى رفعوا أسعار كل شىء وأى شىء حتى المش والجعضيض..؟!
هى حاجة من اتنين: إما إن مسئولى اتحاد الغرف مش عارفين التجار بيعملوا إيه فى الأسواق.. أو أنهم مش عارفين التجار بيعملوا إيه فى الأسواق..!!
أنا شخصيا شايف حاجة تالتة خالص وهى إنهم مش عارفين التجار بيعملوا إيه فى الأسواق..!!
بالمناسبة.. رغم أن أسعار السلع والخدمات نار وأسعار الفايدة فى انحدار.. إلا أن البنك المركزى، الذى يلزمه القانون بخفض معدل التضخم، آخر طناش وعامل نفسه من بنها..!!
طبعا نحن لا نشكو للبنك المركزى.. فالشكوى لغير الله مذلة.
مطرب الغبرة اللى ضرب شاب بالقلم على وشه قدام أمه وأخته.. واضح إن أبوه وأمه كانوا مشغولين جدا فى حياتهم فما كانش عندهم وقت يربوه..!!