جرى لك إيه يا بلد..؟!
آلاف الأمهات كاشفين راسهم، ساعة المغربية، وبيدعوا بالاسم وبحرقة اليومين دول، بالنار وغضب الجبار، على راجل اسمه «طارق» عامل فيلم رعب لكل بيوت المحروسة..!
وبيقولوا إنه ضيع مستقبل أجيال من الشباب اللى عملهم فيران تجارب لأفكاره التعليمية اللى ماحدش فاهمها..!
الأمهات بيقولوا إن الحكومة لازم تتدخل وتنصف مظاليم «السنوية العميا» هذا العام؛ وتوقف التجارب الكارثية لـ «طارئ».. قبل ما يخرب التعليم كله ويقعد على تله..!
طبعا أنا ما قلتش حاجة دول ستات مصر هما اللى بيقولوا..!!
ونصيحتى للحكومة إنهم يستجيبوا لما تقوله الأمهات؛ فأخطر سلاح عرفه المصريون حتى الآن هو «دعوة الوليه ساعة المغربية».. والحكومة مش قد السلاح ده..!
بالمناسبة.. وزيرالتعليم العالى أكد أن كل ناجح فى الثانوية، حتى ولو جايب خمسين فى الميه، له مكان فى الجامعة..!
أفلح إن صدق..!!
الكوسة اتجننت وسعرها بقى بعشرين جنيه حتة واحدة..!!
ياريت المصريين يقاطعوها وياكلوا بدلا منها بامية؛ لأن الكوسة والمحسوبية هما سبب كل البلاوى اللى بنعانى منها فى كل المجالات..!!
فقديما قالوا: الكوسة لما تواتى بتخلى الأعمى ساعاتى..!!
جهاز الإحصاء بيقول إن عددنا زاد ربع مليون نسمة فى خمسين يوما فقط..!
هو ده اللى إحنا فالحين فيه بس..!
للمرة العاشرة بأقول يا ريت وزير المالية يسيب مكتبه المكيف ويخطف رجله لمأمورية الضرائب العقارية بمدينة الحمام المسئولة عن تحصيل عشرات المليارات من حيتان الساحل الشمالى..!
فحال المأمورية يصعب على الكافر، فمبناها آيل للسقوط والعمل كله يدوى لأن اختراع الكمبيوتر لم يصل للمأمورية بعد..!!
ما يحدث هو إهدار للمال العام.. والسكوت على هذه الجريمة، هو من علامات الرضا عليها يا معالى الوزير..!!
التحفيل شغال على ودنه بين الزملكاوية و الأهلاوية اليومين دول.. أمال لو كان فيه كورة بحق وحقيق كانوا عملوا فينا إيه..؟!
مطرب من مطربى الغبرة بتوع اليومين دول بيقول مش مهم جبت مجموع أد إيه فى الثانوية العامة.. المهم اللى يجيب فلوس فى الآخر..!!
مش ها أرد عليه طبعًا، لأنى راجل مؤدب ومش عايز أخدش الحياء العام..!!