الكابتن «أحلق شنبى» يستاهل كل اللى يجرى له وأكتر..!!
فقد كنت فى نص هدومى وأنا أتابع تعليقاته الفاحشة على مباراة القمة، وإسقاطاته الجنسية المكشوفة..!!
بصراحة، أنا شايف إن وقفه عن التعليق لمدة شهر عقوبة لا تتناسب مع الجرم الذى ارتكبه على الهواء مباشرة؛ فقد خدش حياء عشرات الملايين بكلامه الخارج؛ وهى جريمة يعاقب عليها القانون..
عاقبوه فالمثل، اللى لسه مألفه دلوقت، بيقول: «لولاك يا لسانى ما انسكيت يا قفاى»..!!
بالمناسبة.. ما قاله محمد عادل حكم مباراة القمة، فى برنامج على الهواء، عن كواليس المباراة يؤكد أن التحكيم عندنا ماشى بالبيومى..!!
فبعض الحكام يحمل شارة الفيفا عن جدارة.. والبعض الآخر يحمل شارة «فيفا عبده».. لا مؤاخذة..!!
أنا مندهش جدا من طلبات الإحاطة اللى نازلة زى الرز من أعضاء مجلس النواب على وزير التربية والتعليم بسبب منهج العلوم للصف الرابع الابتدائى، والذين وصفوه بأنه أصعب وأعقد منهج فى تاريخ التعليم، وإنه فوق مستوى التلاميذ بل والمدرسين أيضا..!!
يا جماعة عيب دا برضه جزاء الوزير اللى عايز يرتقى بمستوى التلامذة ويوفر عليهم حوالى اتناشر سنة من التعليم.. فالتلميذ من دول بعد ما هايدرس منهج رابعة ابتدائى هايروح دوغرى، من غير تنسيق ولا دياولو، على كلية الطب عدل للحصول على...... «رابعليوس» طب وجراحة..!!
يا جماعة حد يشوف لنا إيه حكاية متعاملى البورصة اللى بيطالبوا بمقاطعتها إذا لم يتم تصحيح الأوضاع بها وإقالة رئيس هيئة الرقابة المالية..؟!
فالحكاية مش ناقصة قلق.. والعيار اللى ما يصيبش يدوش..!!
يا ريت الحكومة تلم الدور وتراجع الإجراءات الاحترازية لوقف انتشار التحورات الجديدة لوباء كورونا، فالوضع لا يسر عدوا ولا حبيبا والاعتماد على وعى الشعب ها يضيع الدنيا، فالناس عايمة فى مية البطيخ وكأن الدنيا آخر انبساط وزبادى فى الخلاط..!
شددوا الإجراءات ولا تعتمدوا على وعى الشعب.. فالمثل، اللى ألفته من زمان، بيقول: خد وهات.. عم «وعى».. مات..!!
جميل جدا أن تتخذ نقابة المهن الموسيقية قرارا بمنع «شاكوش» مطرب المهرجانات من الغناء نهائيا.. بس الأجمل إنها تمنع لنا باقى «الشواكيش» اللى نازلين «دق» على دماغ المصريين وعاملين صداع للساحة الغنائية..!!