الإسماعيلية : أحمد حمدى
سادت فى الفترة الأخيرة تخوفات بين جماهير الدراويش عن نقص أو انخفاض معدل اللياقة البدنية للاعبى الاسماعيلى فى ماتشات الدورى الأخيرة.
وفى هذا الصدد أكد "رامى العملة" مسئول المركز الإعلامي فى النادى الاسماعيلى ، أن هذا الأمر غير صحيح قائلا:فى الحقيقة انا مش شايف ان فى نقص لياقة بنسب عالية او بفرق كبير عن الفرق اللى بتقابلنا لمجرد اننا اتضغطنا فى اخر وقت من المباريات الأخيرة.
واضاف: الاسماعيلى لعب اخر ٣ مباريات ضد طنطا والاهلى وسموحة .
وتابع: المباريات فى وقت قصير ومضغوط وكان فيهم كمية جرى مش طبيعية
وأشار الى ان الاسماعيلى فى مواجهة طنطا قدم مباراة كويسة جدا، وكان الافضل طول المباراة وكان فى كمية جرى كبيرة فى الماتش، و فى اخر ١٠ دقايق تراجع الفريق للدفاع حفاظا على المكسب و ادخار للمجهود لان ذهن اللعيبة كان فى ماتش الاهلى.
واستكمل : بعدها باربع ايام الفريق لعب اصعب ماتش فى البطولة قدام اقوى فريق و معاه مدرب مذاكرك كويس و ترسانة لعيبة اساسيه واحتياطيه عندهم جاهزية كبيرة و لعبت عليهم شوط اول ممتاز وعملت ضغط متقدم كبير جدا وكان فى ماتش تكتيكى بين الاتنين مدربين بينفذه اللعيبه فى الملعب. و الفريق كان ند قوى للاهلى حتى استقبل الهدف الاول وبعدها انخفضت معنويات اللعيبه وتفكك ترابط الخطوط بسبب قلة خبرة اللعيبه والرغبه فى التعويض
وعن ماتش سموحة أكد "العملة" ان الفريق بدأ الماتش بدرن افضل اتنين لعيبة و بدأنا كويس جدا والشوط الاول عملتا جيم كبير و ضيعنا فرص كتير كانت كفيلة اننا نعمل سكور تاريخى
وتابع :فى الشوط الثانى سيطر سموحة بفضل نوعية اللعيبة اللى عنده و انت بتفتقدها زى السرعة فى الهجوم المتمثلة فى اوميد اوكرى، و بلاى ميكر زى ناصر ماهر ،و لعيب وسط بيجيد ضربات ثابته زى نبيل مانجا و اللعيبه دى خلت سموحة عنده الأفضلية فى حين اننا كنا بنبادلهم الهجمات
ومضيفا : دليل عدم انخفاض اللياقه هى الهجمات المرتده اللى عملناها اخر خمس دقايق وكنا بنوصل لمرمى سموحةبانفرادات وبعدد لعيبه كبير زى انفراد ابراهيم حسن فى الدقيقه ٩٢ وانفراد كريم بامبو فى الدقيقه ٩٣ ده غير مجهود عماد حمدى الجبار بعد خروج محمد فتحى ومعافرة بهاء والحد من خطورك اوميد اوكرى ..
مشيرا الى ان : مدرب الاحمال شغله ٩٠٪ منه بيكون بداية الموسم او تحديدا بداية فترة الاعداد و ازاى يوصل باللعيبه للتوب فورم وبيشتغل باقى الموسم فى انه يحافظ على المعدلات اللى وصلها اللعيبه..
واختتم :طبعا كلامى مش معناه ان الفريق مش محتاج مدرب احمال لكن انا بتكلم على اللى شايفه فى الفترة اللى فاتت و اتمنى التعاقد مع مدرب احمال الفترة الجاية لان الكرة الحديثه كلها جرى ومجهود اكتر من المهارة.