الدكتور «التليفزيونجى» إياه عاشق الشهرة والأضواء أفتى، لا فض فوه وعاش حاسدوه، بأن الزوج هو وحده المسئول عن شغل البيت كله، يعنى يكنس ويمسح ويطبخ ويغسل المواعين ويغير «لفف العيال»..!! أما المرأة فدورها هو أنها زوجة وبس، ويجب على الزوج أن يعطيها أجرها طبقا لما يسمى «حق السعاية»..!!
بصراحة أنا مش عارف بسلامته عايز إيه بالضبط..؟! فكلامه ده يخرب البيوت العمرانة، وبيوت الشباب المتزوج حديثا مش ناقصة، فهى ماشية على الحركرك؛ فالزوج والزوجة واقفين لبعض على الواحدة وبيتلككوا على أتفه حاجة؛ بدليل معدلات الطلاق المرتفعة بين المتزوجين حديثا..!!
وبعدين هى كل مشاكلنا انتهت والحمد لله ولم تبق إلا مشكلة مين اللى يغير «لفف العيال» ويغسل «المواعين» فى البيت..؟!!
يا ناس اتقوا الله وبلاش هبل.. فالكلام ده من نوعية العلم الذى لا ينفع والجهل الذى لا يضر..!
بالمناسبة.. صديق صاحب مكتب استشارى هندسى كبير أرسل لى دعوة للانضمام لجروب اسمه «الست الشاطرة اللهلوبة».. أى والله العظيم.. الست.. الشاطرة.. اللهلوبة..!!
يبدو أن أستاذنا الاستشارى الكبير تأثر بفتوى الدكتور التليفزيونجى ففكر فى أن ينقذ بيوت أصدقائه قبل ما تخرب وياخدوا «استمارة سكة»..!!
أنا بأفكر ألبى الدعوة وانضم للجروب ومعاه كمان جروب «إحنا الستات الزهقانين من غسيل المواعين»، تحسبا للأيام السودا اللى احنا داخلين عليها..!!
إيه الهرتلة دى.. إزاى التجار يرفعوا سعر طن الأرز تلتمية جنيه حتة واحدة رغم زيادة المعروض منه فى الأسواق، وإزاى كمان يرفعوا أسعار الزيت عشرين فى المية رغم الركود..؟!!
إذا ما كانش ده اسمه احتكار و«احتقار» من جانب التجار لجهاز حماية المنافسة ومنع الاحتكار.. أمال يبقى اسمه إيه يا متعلمين يا بتوع المدارس..؟!!
مش عارف مين ابن الإيه اللى أشاع على اللاعب المخضرم (ش. م)، فى كل وسائل التواصل الاجتماعى، أنه قال «إن وصول 8 منتخبات عربية لربع نهائى البطولة العربية أكبر دليل على تطور وتقدم الكرة العربية».. وهو كلام لا يمكن أن يصدر عن طفل فى كى جى ون..!!
واضح إن النفسنة و«كيد اللعيبة»، اللى بقوا إعلاميين فى غفلة من الزمن، لبعضهم البعض أصبح أقوى من «كيد النسا».. لا مؤاخذة..!!