أعلنت الفنانة هنا الزاهد عن إصابتها وزوجها الفنان أحمد فهمي بفيروس كورونا، وكتبت على صفحتها الشخصية بموقع “فيسبوك”: “أنا وأحمد ايجابي كورونا، اي حد اتعامل معانا ياريت يطمن على نفسه”.
ولم تكن تلك المرة الأولى التي أصيبت فيها هنا بفيروس كورونا، بل أصيبت به من قبل منذ عدة أشهر ماضية، واكتشفت أثناء تصويرها فيلم بصحبة الفنان أحمد حاتم.
ولكن وقتها غضبت هنا من زوجها الذي اعتبرته لم يقف بجانبها كما ينبغي، وفي لقاء مع الإعلامية منى الشاذلي، ببرنامج “معكم” قالت مازحة: “كنت مسافرة عندى شغل خارج مصر، وأجريت فحوصات كورونا ومكنش في أي مشكلة نهائيا، وكنت بصور مع أحمد حاتم، وأثناء قيامى بأحد المشاهد لقيت المساعدة بتاعتى جاية بتقولى (يا أستاذة إنتى عندك كورونا)”.
وأضافت: ” أحمد حاتم كان واقف قصادي، وبصلي وأنا بصلته وبصيت للمخرج والناس، وفجأة الكل ارتدى الماسكات، وقلت لنفسى إزاى يجيلى وأنا الوحيد اللى ملتزمة، اليوم اتفركش وخلاص بقى”.
وأردفت: “قعدت مصابة 9 أيام وبعدها خفيت، وأختى اتعدت منى، وأنا اتخانقت مع أحمد لما جالي كورونا، أنا كنت متفقة معاه إنه لو جاله كورونا هفضل جنبه وأراعيه، أنا أول ما جالي كان بيقولي ابعدى متقربيش، وأنا الحاجات دي بتأثر في نفسيتي، وكان بيكلمني من ورا الزجاج، وكان بيقولي أنا بروح أزور ماما ومش عاوز أعديها، اتضايقت وقتها لكن اكتشفت بعدين أنه معاه حق وأن ده الصح”.
وعزلت هنا نفسها في منزل والدتها، وأوضحت: “حلفت إنى هسيب البيت وأروح أقعد عند ماما، وكان كل يوم بيجيلي تحت البيت عند ماما وينادي ويقولي إنتي كويسة؟ وكنت بطمنه وأقوله أنا بخير”.