مين الكداب، اللى هيخش جهنم حدف، اللى قال إن مدرب منتخبنا الوطنى كان بيدرب فرقا كبيرة..؟!! ده آخره يلم كور من ورا الشبكة..!
صدقونى المدرب ده مينفعش يدرب منتخبنا.. ده كبيره يشتغل مساعدًا للست خديجة المغربية اللى بتجلب الحبيب وبترد المطلقة؛ واللى يا عينى اطلقت من جوزها ومش عارفة ترجعه تانى لحد دلوقتي..!!
ولأن حجة البليد مسح التختة فالمدرب بعد هزيمته من منتخب نيجيريا دخل فى وصلة ردح مع مشجع من الجمهور المصرى؛ وقال للمشجع ضمن ما قال: تعالى أنت درب الفريق مكانى..!!
يا سلام.. تاهت ولقيناها.. أنت جيت فى جمل يا خواجة أنا شخصيًا مستعد أدرب المنتخب مكانك.. ومش هآخد إلا ربع مرتب حضرتك بس وهعمل نفس اللى بتعمله حضرتك بالضبط: هألعب بخطة "بركة دعا الوالدين".. وهحط كل لعيب فى غير المركز اللى بيلعب فيه أصلاً..وهخلى اللعيبة تتوه فى الملعب.. وهتغلب من طوب الأرض وهكسب أو أتعادل بالبركة.. زى ما حضرتك بتعمل بالضبط..!!
صحيح ناس ليها حظ وناس ليها ترتر على رأى الفنان عبد السلام النابلسى..!!
قرار وزير التربية والتعليم بإعادة مُدرِّسة المنصورة، صاحبة واقعة الرقص، لعملها مرة أخرى.. قرار محترم أخرس المزايدين والمزايدات؛ اللى عملوا من الحبة قبة وكانوا عايزين جنازة يشبعوا فيها لطم..!!
أقل وصف للى بيشمتوا فى الموت، وفرحانين فى اللى ماتوا، إنهم معندهمش ريحة الدم..فأهاليهم خلفوهم وكانوا مشغولين جدًا لدرجة إنهم نسيوا يربوهم..!!
على الرغم من أننى لا أعلم على أى أساس كرمت جامعة عين شمس الممثلة إلهام شاهين..
لكننى مع ذلك ضد أن يتقدم عضو بمجلس النواب بطلب إحاطة لوزير التعليم العالى مستنكرًا هذا التكريم؛ وكأن مجلس نواب مصر، بجلالة قدره، قد انتهى من حل كل قضايانا المهمة ومشاكلنا المتلتلة.. ولم تبق أمامه إلا مشكلة تكريم إلهام شاهين..!!
بصراحة الكل راكبهم الغلط من ساسهم لراسهم..!!
الارتفاع الجنونى الحالى فى أسعار البيض مالوش غير تفسير من اتنين: إما إن التجار اتجننوا.. أو إن فراخ اليومين دول متخرجين من الليسيه والميردى دييه..!!