هانى رمزى: شخصية «غبى منه فيه» قابلتها فى الواقع

قال الفنان هانى رمزى إنه يتمنى تقديم جزء ثانى من فيلمه الشهير " غبى منه فيه ".

وتابع " رمزى" خلال حواره فى برنامج "أحلى كلام"، والذى يقدمه الفنان أحمد فهمى على قناة الحياة قائلا : "نفسى اعمل جزء ثانى من فيلم "غبى منه فيه".. وده مطلب جماهيرى.. الحكاية صعبة خاصة بعد وفاة الفنان حسن حسنى والفنان طلعت زكريا".

أضاف :" اتشجعت بسبب تجربة "أبو العربى".. النهاردة بفكر اخد الشخصية واحطها فى احداث جديدة خالص.. ونلعب على الشخصية وليس امتداد الفيلم وده اللى بدور عليه فى الوقت الحالى".

وأوضح "رمزى"، أن الشخصية التى قدمها فى فيلم "غبى منه فيه"، قابلها فى الواقع مع وجود اختلافات، وأضاف قائلا: "الشخصية دى شوفتها فى حياتى.. كان سايس فى الشارع اللى انا ساكن كده.. وهو كان زى الفيلم كده.. وكنت بقول كل يوم لازم اعمل الشخصية دى.. ومفيش اغبى كده".

وأضاف : "كان شخصية السايس كده يفضل يقولى اكسر يمين.. اكسر يمين بصوت عالى.. زى ما شوفناه فى الفيلم.. وكان بيخلى العربيات تخبط فى بعضها.. ولو اعتمدت عليه يخليك تخبط.. وحلفت أنى لازم اعمل الشخصية دى".