يا جماعة أنا قلتها من زماااااااان.. كيروش مش بتاع بطولات.. كيروش بتاع سندوتشات.. لامؤاخذة..!!
يا ليلة سوخة.. 40 مسلسل حتة واحدة تعرض خلال شهر رمضان الكريم!!
يعنى لو كل مسلسل مدته ساعة إلا ربع يبقى الناس هاتفضل صاحية تلاتين ساعة فى اليوم الواحد علشان تتابع هذا الكم الهائل من المسلسلات من غير أكل ولا شرب ولا نوم.. دا طبعا غير برامج المسابقات السمجة.. وبرنامج المقالب السخيف "إياه" بتاع كل رمضان!!
يا جماعة أنا مع عودة قوتنا الناعمة لسابق عهدها.. لكن مش بالقوى كدا!!
عيب قوى أن يصبح شهر رمضان الكريم موسما لإعلانات التسول من كل شكل ولون من جانب جمعيات ما أنزل الله بها من سلطان تنفق مليارات الجنيهات على حملات تليفزيونية تشوه كل ما هو جميل فى بلدنا؛ وكأن الشعب المصرى كله من أسوان لرأس التين واقف يمد إيده بيشحت على باب السيدة زينب لأنه عايش فى بيوت من غير أسقف أو مياه أو مش لاقى حتى ياكل عيش حاف!!
والله العظيم عيب أن تشوه مثل هذه الجمعيات صورة مصر والمصريين بدون أى خشا أو حيا!!
منتهى التناقض أن يدعو المليونيرات من مذيعى القنوات الفضائية الناس إلى التقشف فى رمضان بطريقة ساذجة "عبيطة"!!
واحد بيقول بكل بجاحة وبلغة عامية ركيكة: "بلاش تحفوا فى الأكل"!!
وواحد آخر يتلذذ، بسخافة يحسد عليها، فى حلاوة وجمال "كوباية الليمونادة" بدلا من مشروبات رمضان التقليدية..وأستاذ علوم سياسية، طالع فى المقدر جديد، أخذ يصرخ فى الناس، وعيناه بتطق شرار، محذرًا إياهم من عمل القطايف بـ"الحاجات الصغيرة" اللى بيحشوها بيها.. يقصد "المكسرات" يعنى..
بس مش عاوز يقولها علشان الاسم بلدى حبتين!!
أقسم بالله غير حانث أن كل هؤلاء المليونيرات لا يستطيعون إقناع طفل فى (كى. جى. ون) بالتقشف أو حتى بالاقتصاد فى الطعام بمثل هذا الكلام الساذج العبيط!!
فكرونى بالمثل الشعبى "إياه": قال له يابا علمنى التفاهة..قال له تعال فى الهايفة واتصدر!!
كلنا شفنا، صوت وصورة، الوجه الحقيقى للكابتن "إياه" وهو بيكشر عن أنيابه وبيشتم ويعتدى على موظف صغير، لاحول له ولا قوة، لمجرد أنه كان بينظم الدخول لاستاد القاهرة قبل مباراة مصر والسنغال!!
بصراحة حاجة تكسف تخلينا نكره كورة القدم واللى بيلعبوها.. والرياضة كلها واللى بيمارسوها.. وتخلينا نلعن اليوم اللى جاب فيه بسلامته هدفه اليتيم
فى كاس العالم!!