قال المهندس أحمد السويدي، خبير الصناعة، إن "قرارات البنك المركزي الخاصة بالاستيراد مش فارقة أوي، ولن تحل أزمة الاعتمادات المستندية، والفكرة الوحيدة فيه دولار ولا لأ؟ هنعرف ندبر دولار عن طريق البنك ولا لأ، وأنا شايف إن أزمة توفير السيولة الدولارية صعبة وهتطول شوية".
وأضاف خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "إحنا مفتحناش اعتمادات بقالنا شهر، ولا حتى تحصيل وشغالين بس على التصدير واعتمادات التصدير، وأزمة الاستيراد أنا شايف أنها هتطول".
وتابع السويدي : "إحنا عندنا أزمة في الدولار، وحلها الوحيد إننا نصدر ونشجع التصدير، ولكن لو هنشتغل بنفس الأسلوب القديم الأزمة هتستمر وهتطول".
ومضى قائلا: "أنا بستخدم ال دولار اللي جايلي من التصدير بأني أزود المعدات وأجيب قطع غيار علشان أزود الإنتاج والتصدير، ولكن لو اعتمدت على أني أستهلك ال دولار في السوق المحلي خلال أسبوعين هقفل المصانع".
وأشار السويدي: "عايزين نبص على تركيا اللي كل شهر التصدير والنمو والتشغيل بيزيد، ولازم نضاعف التصدير الفترة اللى جاية وإلا هنقفل وده مش حل لنا في مصر، ولو شفنا آخر 3 سنين السوق المصري كله بضاعة تركي لأن بضاعتهم رخيصة لدعمهم القدرة على التصدير هناك".