كشف الفنان تامر عبد المنعم، تفاصيل جديدة بشأن تبني المحامي الراحل فريد الديب الدفاع عن الطالب محمد عادل قاتل الشابة نيرة أشرف.
وأوضح خلال لقائه ببرنامج "في اَي بي" الذي تقدمه الإعلامية أميرة بدر بقناة "هي": "لما تبنى فريد الديب قضية قاتل نيرة أشرف، أنا كلمته وقتها، قال لي: انت هتعمل زي الناس اللى مش فاهمة وطالعة تهاجم، فقلت له: طيب أنا عايز افهم علشان ناس كتير بتسألني".
وتابع: "وانا باكلم الأستاذ فريد الديب كانت قاعدة جنبي بنتي الصغيرة سلمى، وهي اللي اثارت الموضوع، وقالت لي: ناس عمالة تكلمني وتقول لي جدك خد القضية".
وأشار: " فريد الديب قال لي أنا محامي ورجل قانون وما حدث أثناء النطق من الحكم من الدائرة القضائية في القانون اللى انت متعرفوش غلط، والقانون يحاسب عليه، والقاضي مينفعش يفصح عن نواياه، وقال لي: انا هقدم نقض مجاني وبدافع عن القانون وقد يتاخد بالنقض والولد هتتعاد محاكمته وياخد إعدام برضه، وقعد يضحك".
في وقت سابق، كشفت حنان فريد الديب ابنة المحامي الراحل فريد الديب، كواليس بشأن الأيام الأخيرة في حياة والدها.
وقالت خلال لقائها ببرنامج "مساء دي إم سي" الذي تقدمه الإعلامية إيمان الحصري بقناة "دي إم سي": "يوم 3 سبتمبر قبل وفاته نزل المحكمة وكان عنده قضية وكان تعبان وقتها وكان رايح على كرسي، ولما جاء وقت المرافعة وقف أمام المحكمة واترافع وهو واقف على قدميه، ويومها زعل لأنه حس إنه جسمانيًّا مش قادر، ولكن واعٍ ذهنيًّا وعقليًّا لحد آخر وقت من عمره".
وأضافت: "أختي إيمان الله يرحمها كانت تقول لي أبوكِ يوم ما هيحط القلم يوم ما هيحط راسه".
ولفتت: "والدي كان بيحضَّرني أنا وإيمان أختي ليوم وفاته، وكان بيقول لنا أنا هموت ولازم تاخدي بالك من نفسك، وإن ده أمر الله ولازم هينفذ".
وأشارت: "والدي كان دخل المستشفى علشان يعمل عملية بذل من الرئة، وهو كان يعاني من سرطان الدم، وفجأة تعب جدًّا وفي آخر يوم له جابني، وقال لي أنا بموت وعارف إني بموت ودِّيني أموت في البيت.. أنا مش هموت هنا في المستشفى.. أنا طبعًا قعدت أعيط وأقول له: لأ ما تقولش كدة، وما تسبنيش، فطبطب عليَّ وقال لي: أمر الله، فأطعته وأخدته للبيت، وفعلًا مات في البيت زي ما هو عايز".