أخشى أن يكون تأجيج الصراع الدموى على الكراسى فى السودان يستهدف أمننا القومى.. فاللعب بالنار فى فنائنا الخلفى خطر جسيم..
كما أنه من الواضح للعيان أن الصراع عبثى لا غالب فيه ولا مغلوب.. والخاسر الوحيد فيه هو وحدة السودان والأمة العربية.. ربنا يستر.. عودة مسلسل انهيار العقارات فى الإسكندرية بيؤكد أكثر من حقيقة خطيرة سبق أن حذرت منها فى هذا المكان.. أول هذه الحقائق إن ضمائر وذمم معظم مسئولى الأحياء فى إجازة؛ وهى أوسع من نفق شبرا.. وثانيها أن أجهزة الرقابة ب الإسكندرية بعافية حبتين.. فهى بتمشى على سطر وبتسيب سطر..!!
كما أن هذه الظاهرة القاتلة تثبت بما لا يدع أى مجال للشك "إن اللى بنى مصر كان فى الأصل حلوانى" لكن اللى بنى الإسكندرية كان فى الأصل.. بتاع بسبوسة.. لا مؤاخذة..!!
دعوة الرئيس البرازيلى للتخلى عن الدولار فى المعاملات التجارية فكرة هايلة و"نميسة".. بس ياريت حضرته يقول لنا إزاى نعمل ده وإحنا كدول نامية معاه على طول الخط و"ايدينا على كتفه"..!!
فجدتى قالتها حكمة من زمان: "إيش غرض الأعمى.. قالوا قفة عيون"..!!
إيه الكوسة والهرتلة دى..؟!
إزاى معهد جالوب بتاع استطلاعات الرأى.. يختار فنلندا الأولى على العالم كأكثر دولة سعيدة فى الكون..؟!
أمال إحنا فين..؟!
ده إحنا عايشين فى منتهى السعادة اللى فى الدنيا.. والسعادة عندنا بالقنطار من الفجر للفطار.. وعيشتنا آخر انبساط وزبادى فى الخلاط..!
عندى بس سؤال بسيط لمشايخنا الأفاضل: اللى بيكدب عليه إطعام كام مسكين..؟!!
قيام بعض الأهالى فى محافظتين مختلفتين بالاحتفال بالزغاريد واللافتات، بخروج بطل إحدى مسلسلات رمضان من السجن، وفق أحداث المسلسل، بل توزيع الشربات والعصائر على المارة ابتهاجا بهذا الحدث اللى هو "كده وكده"؛ يعنى حاجة من اتنين إما إن الأهالى عايشين حالة مرضية من الفراغ والتفاهة؛ وسايقين الهبالة على الشيطنة؛ أو إن "الصنف" اللى بيتعاطوه أصلى مية فى المية بتاع بلده..!!
نقول إيه..؟! ربنا لا تؤاخذنا بما فعل السفهاء منا..!!
نفسى ومنى عينى إنهم يقرروا مسلسل "1000حمدالله على السلامة" على طلبة معهد السينما ليدرسوه جيدا.. قصة وسيناريو وحوار وتمثيلا وإخراجا وكافة شىء.. علشان مايعملوش زيه أبدا.. فهو حاجة ببلاش كده..!!